छ्याकःल्वहं प्रहरीया नियन्त्रणय्
लहनान्युज | पोहेलाथ्व पंचमी ११३९ (जनवरी ११ २०१८)
![](https://www.lahananews.com/sites/default/files/49829574_274619499880534_1118628501440692224_n.jpg)
किपुलिइ पुष २७ गतेयात हाकूगु न्हि कथं हंगु दु । नेवाः प्रदेशय् आदिवासी जनजाति जागरण अभियान, आदिवासी जनजाति महासंघ, आदिवासी जनजाति महिला महासंघ, आदिवासी जनजाति राष्टिय आन्दोलन नेपाल जाना थौं शुक्रवाः अथे हाकुन्हि हंगु खः ।
किपूया नगां दोवाटो लागाय् छगू सभा याःगु खः । उगु सभाय् आदिवासी जनजाति अभियान्ता श्रीकृष्ण महर्जनं पृथ्वी नारायण शाहयात गुगु नं हालतय् राष्टिय एकता प्रतिकया रुपय् आदिवासी जनजाति नेवाःतय्सं स्वीकार यायेफइमखु धकाः धयादिल ।
उगु इलय् पृथ्वीनारायण शाहया फौजं युद्ध याःगु अले युद्धया नियम अःखः तकं मनूतय्त स्याना बिउगु घटनायात न्ह्यथसें पृथ्वीनारयाण शाहलिसे युद्धयाःम्ह किपूया योद्धा कीर्तिलक्ष्मीया किपाः तकं सार्वजनिक यानादीगु खः । अले किपुलिइ कीर्तिलक्ष्मीया सालिक तयेगु ज्या जनस्तरं यायेगु जुइ धयादिल ।
उगु सभाय् आदिवासी जनजाति महिला महासंघया नानु थामी व जनजाति नेता कुमार राई नं गुगु नं हालतय् पृथ्वीनारायण शाहयात राष्टिय एकताया प्रतिकया रुपय् स्वीकार यायेफइमखु धकाः धयादिल । वय्कःपिन्सं नेपालय् पृथ्वीनारायण शाह नं सुरु याःगु विभेद आः तक नं कायम दु उकिं संघर्ष यायेमाःगु आवश्यकता दु धयादिल ।
नेवाः प्रदेशय् आदिवासी जनजाति जागरण अभियानया कजि अर्जुन महर्जनं न्ह्याकादीगु उगु ज्याझवलय् कीर्तिलक्ष्मीया बारे अनुसन्धानकर्ता विनोद महर्जनं कनादीगु खः ।
अनं लिपा नाराबाजी याना जुलुस सहित किपूया छ्याकःल्वहं दुगु लागाय् वंगु खः । उगु इलय् प्रहरीं छ्याकःल्वहंयात घेराबन्दी यानातःगु खः । च्वय्या आदेश कथं धकाः छ्याकःल्वतय् थुकलं बिइगु जुइमखु धकाः प्रहरीं धायेवं छगू कथं अन तनाव ब्वलंगु खः ।
थौं किपुलिइ तनावया दथुइ जूगु सभाय् आदिवासी जनजातिया न्ह्यलुवाः आडकाजि शेर्पां पृथ्वीनारायण शाहयात गुगु नं हालतय् राष्टिय एकताया प्रतिकया रुपय् स्वीकार यायेगु जुइमखु धयादिसें पृथ्वीनाराण शाह धाइम्ह युद्ध अपराधी खः धकाः धयादिल ।
अथे हे नेपाल आदिवासी जनजाति महासंघया छ्याञ्जे गोविन्द छन्त्यालं पृथ्वीनारायण शाह नं सुरु याःगु विभेद आः तक नं कायम जुयाच्वंगु दु धयादिसें आदिवासी जनजातितय्सं थःपिनिगु हक अधिकार प्राप्त मजूतले आन्दोलन जारी याइ धयादिसें छ्याकःल्वतय् थुकलं तकं मबिइकेगु कथंया गुगु कथं राज्य क्वहां वल थ्व बास्तवय् नेवाः नापं आदिवासी जनजातिय्गु परम्परातय् तकं तःधंगु पंगः खः धयादिल ।
थःपिं निरन्तर रुपं आन्दोलन याना वनेगु जुइ धयादिल । अनं लिपा अभियान्त श्रीकृष्ण महर्जनं छ्याकःल्वतय् थुकलं बिइकेगु ज्याय् पंगः थंगु अवस्थाय् नं छ्याकःल्वहंया मेगु नमुना तया मंकाः कथं थुकलं बिइगु जुइ धकाः घोषणा यानादिल । अले मंकाः कथं थुकलं बिइगु ज्या तकं याभःगु खः । छ्याकःल्वतय् किपूमितय्सं न्हापांनिसें पृथ्वीनारायण शाहया नामय् थुकलं बिया वयाच्वंगु खः ।
किपुलिइ युद्ध लिपा नं किपूमितय्त अन्याय याना न्हाय् म्हुतुं ध्यंगुलिं उकिया विरोधया प्रतिक कथं पृथ्वीनारायण शाहया नामय् थुकलं बिइगु याना वयाच्वंगु खः । लिपांगु इलय् वया छ्याकःल्वतय् दँय् दसं पुष २७ गते थुकलं बिइगु याना वयाच्वंगु खः ।