सुगतरत्नयात हाकः पाकूगुलिं जागरण मञ्चपाखें घोर भत्सर्ना
लहनान्युज | पोहेलाथ्व पारु ११३ (जनवारी ६ २०१८)
नेपाल वायुसेवा निगमया महाप्रबन्धक सुगतरत्न कंसाकारयात हाकः पाकेगु ज्यायात कयाः नेवाः जागरण मञ्चं छगू प्रेस वक्तव्य सार्वजनिक यासें उगु ज्याखँयात कयाः थुज्वःगु ज्या क्वह्यंगु व घृणित ज्या जूगु खँ धाःगु दु ।
उगु वक्तव्यय् धयातःगु दु, ‘स्वनिगःया छम्ह आदिवासी नेवाः जुयाः देसया छम्ह कुशल प्रशासकया रुपय् थःत स्थापित यायेत ताःलाःम्ह नेपाल वायुसेवा निगमया महाप्रबन्धक सुगतरत्न कंसाकारयात वैद्य माओवादीया कार्यकर्ता्पिन्सं हाकः पाकेगु थुज्वःगु क्वह्यंगु व घृणित ज्यां यानाः नेपाःया आदिवासी जनजातिपिन्त अपहेलना व तिरस्कार यायेगु ज्या याःगु दु ।’
उगु वक्तव्यय् सुं नं मनू न्यायालयपाखें प्रमाणित मजुइकं दोषी ठहर जुइमखु धैगु विश्वन्यंकंया सार्वभौम मान्यता खः । थुगु मान्यतायात वांछ्वयाः थःपिन्त क्रान्तिकारी धाइपिन्सं संसदया सार्वजनिक लेखा समितिं नीस्वंगु उपसमितिया कार्यकर्ता कथं थःत न्ह्यब्वःगु स्वयं नं मछालेपुसे खँ जूगु धासें वक्तव्यय् थ्वया न्ह्यः नं सुगतरत्न कंसाकारयात भ्रष्टाचारया द्वपनय् फसे यायेगु षडयन्त्रयात कयाः नेवाः समुदायया हे सक्रियताय् असफल यानाब्यूगु व न्यायालयपाखें भ्रष्टाचार मजूगु ठहर याःगु खँ थु थाय् लुमंके बहः जू धकाः धयातःगु दु ।
वक्तव्यय् अन्तय् सुगतरत्न कंसाकारयात हाकः पाकेगु ज्या याःपिन्सं थुज्वःगु छुं हे खँयात ल्याः मतसे क्यंगु ज्यायात कयाः घोर भत्सर्ना यासें देसय् दूगु गुगु नं पक्षपाखें नेवाःतय्गु विरुद्ध जूगु अपहेलना व दमन नेवाःतय्गु नितिं सह्य जुइमखु धासें थ्व खँय् सकल नेवाःत जानाः विरोधया सः थ्वयेकेत नं इनाप यानातःगु दु ।
