शंखधर साख्वाःप्रतिष्ठानय् चन्दनकृष्ण
बाबुकाजी श्रेष्ठ | थिंलागा नवमी ११३९ (दिसेम्वर ३१ २०१८)
![](https://www.lahananews.com/sites/default/files/sakdhar.jpg)
राष्ट्रिय विभूति शंखधर साख्वाः प्रतिष्ठानया स्व क्वःगु तःमुँज्यापाखें चन्दनकृष्ण श्रेष्ठयात प्रतिष्ठानया नायः पदय् निर्विरोध कथं ल्यःगु दु ।
प्रतिष्ठानया नायः श्यामकृष्ण मानन्धरया सभाध्यक्षताय् जूगु उगु तःमुँज्याय् प्रदेश नं. ३या सभासद् डा. राजेन्द्रमान श्रेष्ठं उलेज्या यानादीगु खः । \
उगु मुँज्यापाखें छ्याञ्जे ज्ञानराम श्रेष्ठं वार्षिक प्रगति प्रतिवेदन व ज्याझ्वः अथे हे दांभरि ज्ञानकृष्ण श्रेष्ठं आर्थिक प्रतिवेदनलिसें अनुमानित बजेट न्ह्यब्वयादीगु खःसा उगु प्रतिवेदन व प्रस्तावयात सर्वसम्मतं पारित याःगु खः ।
उगु मुँज्यापाखें चन्दनकृष्ण श्रेष्ठ नायः, ज्ञानराम श्रेष्ठ न्वकू, ज्ञानकृष्ण श्रेष्ठ छ्याञ्जे, बाबुकाजी श्रेष्ठ ल्यू छ्याञ्जे व दांभरिइ सुरेश प्रधानयात जुयादीगु दुसा दुजलय् निर्मलकुमार भट्टराई, कृष्णलाल गोजा श्रेष्ठ, जगतकृष्ण श्रेष्ठ, दिलकृष्ण प्रजापति, अन्जनादेवी मधिकःमि, नरगोविन्द शंखदेव, अम्बिरकाजी श्रेष्ठ व दिनेश कोजुयात ल्यःगु खःसा बालगोपाल श्रेष्ठ व रामकेशरी श्रेष्ठयात दुजलय् मनोनित याःगु दु ।
मुँज्याय् मध्यपुर थिमि नगरपालिकाया उपप्रमुख अन्जनादेवी मधिकःमि, प्रतिष्ठानया संस्थापक नायः मदनकृष्ण श्रेष्ठ, मध्यपुर थिमि नगरपालिका ४या वडानायः कुमार श्रेष्ठ व गरीबी निवारण कोषया न्वकू निर्मकुमार भट्टराईं भिन्तुना न्वचु बियादीगु खः ।
ज्याझ्वः प्रतिष्ठानया ल्यूछ्याञ्जे बाबुकाजी श्रेष्ठं न्ह्याकादीगु खः ।