कमल प्रकाश मल्लयात बिचाः हायेकल
लहनान्युज | कछलागा दुतिया ११३८ (नोभेम्वर २५ २०१८)
मदुम्ह प्रा. डा. कमल प्रकाश मल्लयात म्हिग बिचाः मुँज्या जुगु दु । उगु ज्याझ्वः नेवाः न्ह्यलुवा मल्ल के सुन्दरया छेँ याःगु खः । करिब दच्छि न्ह्यःनिसें म्हं मफया च्वंम्ह कमल प्रकाश वंगु शनिवाः अमेरिकाय् मदुगु खः ।
वय्कःयात बिचाःहायेकेत नेपालभाषा केन्द्रीय विभाग प्रमुख प्रा.डा. ओमकारेश्वर श्रेष्ठ, पूर्व प्रमुख प्रेमशान्ति तुलाधर, विभागया शिक्षक शिक्षिकापिं मल्लके सुन्दरया छेँ झायाः शोक पौ लःल्हाःनादीगु खः ।
अथेहे भाषा विज्ञान समाजया नायः भीम नारायण रेग्मींनं शोक पौ लःल्हाःनादीगु खः । मदुम्ह मल्लयात बिचाः हायेकेया नितिं नेवाः देय् दबूया नायः नरेश ताम्राकार नापं थीथी पदाधिकारीपिं, ज्यापु महागुथिया नायः राजभाइ जकःमि, जनकवि दुर्गालाल श्रेष्ठ, नेपाल लिपि गुथिया पदाधिकारीपिं, नेवाः न्ह्यलुवा डा. महेश मान श्रेष्ठलगायत थीथी संघ संस्था, राजनीतिक पार्टी, खलः पुचः पाखें सुथसिया ९ ताःनिसें बिचाः हायेकूगु दु ।
मदुम्ह डा.मल्ल च्वसापासा, आशा सफूकुथि व नेपालभाषा अकाडेमीया संस्थापक खः । वय्कःया थीथी भाय्या थ्यंमथ्यः निगू दर्जनति सफू पिदंगु मध्ये 'A Dictionary of Classical Newari' The Gopalarajabamsavali', 'The Road to No Where' चर्चित जूगु धाःगु दु ।
बुखँ नेवाः सुचना केन्द्र किपा राजेन्द्र रंजित
