गणेशमान सिंहया १०४ क्वःगु बुदिंया हन
नृपेन्द्रलाल श्रेष्ठ | कछलाथ्व तृतिया ११३९ ( नोभेम्वर १० २०१८)
लौहपुरुष कथं नांजाम्ह सर्वमान्यनेता गणेशमान सिंहया १०४ क्वःगु बुदिंया लसताय् गणेशमान सिंह तथा जन आन्दोलन सहिद स्मृति प्रतिष्ठानया ग्वसालय् थौं येँया शान्ति वाटिकाय् तुच्चा ज्याझ्वः नाप हने ज्या लिसे सफू पित ब्बज्या जुगु दु ।
थौंया ज्याझ्वलय् मूपाहाँ सम्माननिय उप राष्ट्रपति नन्दबहादुर पुनं मह जोडीया रुपय् नांजापिं मदनकृष्ण श्रेष्ठ व हरिवंश आचार्ययात जन आन्दोलनया ईलय् यानादीगु योगदानया कदर यासे जन आन्दोलन स्वर्ण पदक लःल्हायेगु ज्या जुगु खःसा मूपाहाँ उपराष्ट्रपति पुनं योगेन्द्रमान श्रेष्ठं ऐतिहासिक विषयलय् च्वयादीगु सातसाल लिपाया सातमहिना नांयागु नेपालभाषाया सफूया पितब्वज्या न यानादीगु खः ।
थौं पितब्वज्या जूगु सफूयात कया नेवाः न्ह्यलुवा मल्ल के सुन्दरं समालोचना यानादिगु खः ।
प्रतिष्ठानया नायः भिमसेनदास प्रधानं लसकुस न्वचु तयादीगु थौंया ज्याझ्वलय् संविधानसभाया पूर्व सभामुख सुभाष चन्द्र नेम्बाङ , नेपाली कांग्रेसया नेता कृष्ण सिटौला, पूर्वउपप्रधानमन्त्री प्रकाश मान सिंहया नापनापं सम्मानित जुयादीपिं मदनकृष्ण श्रेष्ठ व हरिवंश आचार्य्पिन्सं नुगः खँ तयादीगु खः।
