येँयाः जात्रा मर्यादितकथं हने
![](https://www.lahananews.com/sites/default/files/field/image/IndraJatra_small.jpg)
स्वनिगः थौंकन्हय् जात्रामय जुयाच्वंगु दु । स्वनिगःया आदिवासी जनजाति नेवाःतय्गु च्यान्हुतक न्ह्याइगु थुगु तःजिगु नखः थीथी साँस्कृतिक झाँकिलिसें थुगु जात्रा जुयाच्वंगु दु । विश्वय्् हे नांजाःगु लिसें नेपालय् जक दुगु जीवित देवी कुमारीलिसें भैरव व गणेशयात नं खतय् तयाः स्वनिगःया पुलांगु शहरय् चाःहिकीगु खः । थ्व हे झ्वलय् न्हापांगु दिनस दिवंगत जूपिनिगु छेँजःपिं सुखावती भुवनस बास लाय्मा वा आत्माया चीर शान्तिया कामना यासें उपाकु वनीगु धकाः पुलांगु येँय् देय् चाःहिलीगु खः ।
यःसिं थनेधुंकाः शुरु जुइगु थुगु जात्राय् विशेष यानाः किलाघःपाखें दीप्याखं व पुलुकिसि पिहांवइगु खःसा हल्चोकपाखें आकाश भैरव अर्थात सवभकु द्यःगण पिहांवइगु खः । अथे हे येँया मजिपातं राष्ट्रं हनातःम्ह लाखेया आकर्षण अलग्ग हे दु । थ्व वालय् हे देय्या क्वःने, थःने व दथुया रुटं यानाः स्वन्हुतक कुमारी, गणेश व भैलःद्यः खतय् तयाः परिक्रमा याकीगु खःसा उकिया ल्यूल्यू पुलुकिसि, लाखे व सवभकु चाःहिलीगु खः ।
दीप्याखं धाःसा क्वःने, थःने व दथु याःबलय् निश्चित थासय् प्याखं हुइकीगु खः । थ्व हे झ्वलय् महाकाली प्याखं लिसें समेबजि इनेगु, नयुगु, हाथु हाय्केगु, दलूचा मत च्याकेगु आदि ज्या जुइ । गुगु नेवाःतय्गु थःगु हे मौलिक परम्परा खः । थ्व इलय् पिथनीगु बौमत, दागिंया थःगु हे महत्व दु ।
नेवाःतय्सं हना वयाच्वंगु थुगु नखः स्वय्त पर्यटकपिं नं उलि हे लालायित जुयाच्वनी । देशय् पर्यटकपिं दुहांवइगु ला अर्थात महिना नं सेप्टेम्बर हे खःसा थ्व हे इलय् थुगु जात्रा जुइगु खः । उकिं नं थ्व जात्रा स्वय्गु नितिं पर्यटकपिं येँ दुहांवइगु खः ।
बहुभाषिक, बहुसाँस्कृतिक, बहुधार्मिक देय् नेपालय् थीथी जातिया थःथःगु हे मौलिक परम्परा दुगु सकस्यां स्यूगु हे खः । झीगु देशय् वइपिं पर्यटकपिं नं थनया आदिवासीतय्गु संस्कृति, रहनसहन, नसात्वँसा आदि स्वय्त हे वइगु खः । वपाखें आनन्द कयाः थःगु देशय् लिहां वनीगु खःसा गुलिं थनया संस्कृतिया नापनापं नेपाःया न्ह्यइपुस्सेच्वंगु प्राकृतिक दृष्यया रसास्वादन यानाः आनन्दया अनुभूति कयाः वनीगु खः ।
नेपाःया मेरुदण्ड जुयाच्वंगु पर्यटन व्यवसाय च्वन्ह्याकेगु खःसा देशया अमूर्त सम्पदायात ल्यंकेगु नितिं झीगु मौलिक जात्रा, संस्कृतियात हनेगु जक मखु, थुकियात थुइकाः मर्यादित ढंगं हनेमाःगु आःया आवश्यकता नं खः । थजाःगु संस्कृतिइ विकृति वःगु हुनिं व थुकिया महत्वयात थुइकेगु स्वयां नं परम्परागत ढंगं जक न्ह्यानाच्वंगुलिं नं ल्याय्म्ह पुस्तातय्सं थुकियात नाला कयाच्वंगु मदु, गुलिसिनं नाला कयाच्वंगु दु, थुकिया महत्वयात थुइकेगु स्वयां नं मनोरञ्जनकथं जक हनाच्वंगु दु ।
थथे जुल धाःसा थुकिया महत्व म्हो जुयावनीसा विकृतित अप्वया मवनी धकाः धाय् फइमखु । उकिं थजाःगु खँयात ध्यान तयाः साँस्कृतिक महत्वयात थुइकाः मर्यादित ढंगं थुगु जात्रा न्ह्याकेमाःगु दु । गुकिं यानाः झी नेवाःतय्गु पहिचानयात ल्यंकेत उलि हे महत्वपूर्ण जुयाच्वनी ।