अमेरिकाया राष्ट्रपति पदया चुनावय् डोनाल्ड ट्रम्प निगुगु कार्यकालया निति विजयी जूगु दु। कुल ५३८ सिटय् ट्रम्पं २७७ व कमला ह्यारिसं २२४ सिट त्याकूगु दु धका अमेरिकाया सञ्चारमाध्यम एपी न्यूजं धाःगु दु।त्याकेगु निति कम्ती न २७० सिट त्याकेमाः।

ट्रम्पं त्यायेवं अमेरिकाये राजनीतिक ह्यूपाः वइगु सङ्केत खने दुगु दु। ट्रम्प त्यायेवं अन्तर्राष्ट्रिय ख्यलय् थीथी प्रतिक्रिया वःगु दु, विशेषयानाअमेरिका–चीन सम्बन्ध, जलवायु ह्यूपालय् नीति व नाटोया मुद्दाय् यक्कोे प्रभाव जुइफुगु अनुमान दु। ट्रम्पया निगुगु कार्यकालय् ‘अमेरिका न्हापागु’ नीति न्ह्याकेत अमेरिका व मेमेगु राष्ट्र दथुइ याःगु सम्बन्धयात पुनः परिभाषित याइगु सम्भावना दु।

व्यावसायिक पृष्ठभूमिया ट्रम्पं न्हापागु कार्यकालय् आर्थिक सुधारया पलाः ल्ह्वनेमाःगु नाप आप्रवासन, कर नीति व व्यापार सम्बन्धय् कडा अडान काःगु इतिहास दु। ट्रम्पया समर्थकतय्स थ्व त्याःगुयात अमेरिकाया ‘स्वतन्त्र’ नाप ‘सशक्त’ नीति पुनःस्थापनाया विजय खः धका धासां आलोचक तय्स अन्तर्राष्ट्रिय सम्बन्धय् अस्थिरता हयेफु धका चेतावनी बिउगु दु।

Categorized in अन्तर्राष्ट्रिय