नेपाल सम्वत ११४५ न्हुदँ व स्वन्तिया लसताय् यल महानगरपालिका १६ वडा कलाकार समितिया ग्वसालय् जूगु निक्वःगु हुलाप्याखं कासा आयोना लाखां त्याकगु दु।

गोल्मढी, ख्वपया आयोनां २२ म्ह कासामिपिन्त ल्यूने लाकाः शिल्ड, दसिपौलिसें ५० द्वः तकाः नगद सिरपा त्याकादीगु खः। कासाय् ल्यू चाकुपात, यलया इभान धाख्वा, लियांल्यू काय्गुननि, यलया लक्कि महर्जन व हःपा न्याखाचुक, यलया उत्पला बज्राचार्यं त्याकागु दु।

वय्कःपिन्सं छसीकथं शिल्ड, दसिपौलिसें नगद सिरपा ३० द्वः तका, १५ द्वः तका व ५ द्वः तका त्याकादीगु खः।यलया कात्तिदबुलिइ जूगु उगु कासाय् वरिष्ठ कलाकार लोकगायक रत्न बेहोशी बज्राचार्ययात “ललितरत्न” उपाधिपाखे हनादीगु खः। कला ख्यलय् जीवन पानादीम्ह बज्राचार्ययात ललितपुरया रत्न भाःपा हंगु थुगु ज्याझ्वलय् वयकःयात दोसल्लां न्ययेकाः हनापौ देछाःगु खःसा नगद १५ द्व तका नं देछाःगु खः।

थुगु हना दकले न्हापांगु खुसी वरिष्ठ कलाकार मोहनप्रसाद जोशीयात देछाःगु खःसा निक्वःगु खुसी वरिष्ठ कलाकार बज्राचार्ययात देछाःगु खः।

यल महानगरपालिका १६ वडाया अध्यक्ष निर्मलरत्न शाक्यया सभाध्यक्षताय् जुगु उगु ज्याझ्वलय् वडाया कलाकार समितिया संयोजक सुरजवीर बज्राचार्यया ल्यूनायःसुइ जूगु थुगु ज्याझ्वः जनसंगीत श्रष्टा अमरराज शर्मा राजोपाध्यायको मूपाहांसुइ जूगु खःसा ज्याझ्वलय् संघीय सांसद प्रेमबहादुर महर्जन, यल महानगरपालिकाया उपप्रमुख मञ्जली शाक्य बज्राचार्य, प्रदेश सांसद रामकृष्ण चित्रकार, १६ वडा सदस्य नापं कार्यपालिका सदस्य वविता श्रेष्ठ, राष्ट्रिय उपभोक्ता मञ्चया नायः प्रेमलाल महर्जन, नृत्य निर्देशक संघ नेपालया नायः भूवनदास श्रेष्ठ, वरिष्ठ कलाकारपिं नारायणदेवी प्रधान, राधेश्याम प्रधान थेंजाःपिं ब्यक्तित्वपिनिगु ब्वति दुगु खः।

Categorized in कासा