नेपाल कम्युनिष्ट पार्टी (माओवादी केन्द्र)या नायः पूर्वप्रधानमन्त्री पुष्पकमल दाहाल ‘प्रचण्ड’ नं कुम्भेश्वरय् स्थापना यानातःगु कम्युनिष्ट पार्टीया संस्थापक नरबहादुर कर्माचार्यया झ्वाताय् स्वाँमाः क्वखायेका वय्कःया बूदिं शताब्दी ज्याझ्वः न्ह्याकादिइगु दु।

नायः दाहालं नेता कर्मचार्यया झ्वाताय् स्वाँमाः क्वखायेकेगु ज्या धुंकांलि बूदिं शताब्दीया ज्याझ्वः न्ह्यागु नरबहादुर कर्माचार्य स्मृति प्रतिष्ठानया कार्यवाहक नायः गिरिराजमणि पोखरेलं धयादिइगु खः।

“कर्माचार्यया जन्म जूगु सछि दँ दत, थ्व दच्छिया दुने देँ न्यंक ज्याझ्वः यायेत्यंगु दु, थौं न्हिनय् प्रज्ञा प्रतिष्ठानय् बूदिंया शताब्दी न्ह्याकेगुया अवसरय् ‘नेपाः कम्युनिष्ट आन्दोलनया ७५ दँ व आः वइगु कार्यभार’ शीर्षकय् विचाः गोष्ठी जुइत्यंगु दु, दे न्यंकलं ज्याझ्वः यायेत पार्टी पङ्क्तियात निर्देशन बियातःगु दु”, कार्यवाहक नायः पोखरेलं धयादिइगु खः।

गोष्ठीयात माओवादी केन्द्रया नायः पुष्पकमल दाहाल, नेपाः कम्युनिष्ट पार्टी (एकीकृत समाजवादी)या नायः माधवकुमार नेपाल, कम्युनिष्ट नेता मोहन वैद्य, मोहनविक्रम सिंह, युवराज ज्ञवाली, अनिल शर्मालगायतया नेतातय्सं न्वानादित्यंगु ज्याझ्वः दूगु वय्कलं कनादिल। विसं १९८१ कात्तिक १४ गते किजापूजाया दिं यलया झपात्वालय् बा चन्द्रबहादुर व माँ श्रीकुमारीया कोखं बूम्ह कर्माचार्य २०७० साल साउन ९ गते येँ मदूगु खः। विसं २००६ य् भारतया कोलकाताय् च्वंगु वडा बजारय् पुष्पलालया संयोजकत्वय् स्थापना जूगु नेकपाया कर्माचार्य, निरन्जन गोविन्द वैद्य व नारायणविलास जोशी दुजः खः।

वय्कः २००५ सालनिसें प्रजातन्त्र सङ्घय् संलग्न जुया राणाविरोधी व मजदुर आन्दोलनय् सक्रिय जुयादिइगु खः। पार्टी निस्वने धुंका कर्माचार्य मजदुर सङ्गठनया संस्थापक नायः जुयादिइगु खःसा २०१६ सालया निर्वाचनय् तत्कालीन यल नगरपालिकाया मू हामाय् निर्वाचित जुयादिइगु नापनापं २०१९ सालय् पूवंगु स्वक्वःगु महाधिवेशनं नेकपाया केन्द्रीय दुजलय् निर्वाचित जुयादिइगु खः।

उगु ज्याझ्वलय् माओवादी केन्द्रया न्वकू नारायण काजी श्रेष्ठ, न्वकू पम्फा भुसाल, मूछ्याञ्जे देवबहादुर गुरुङ, नेता रामनारायण बिडारीलगायतया नेतातय्गु उपस्थिति दूगु खः।

Categorized in राजनीति