नेपाः साफ मिसा च्याम्पियनसिप–२०२४ या सेमिफाइनलय् थ्यंगु दु। पुचः तगिमय् लिपागु कासाय् श्रीलङ्कायात ६–० गोलं बुकाः नेपाः समूह ‘बी’ खय् न्हाप जूगु खः।

नेपालं सेमिफाइनलय् आइतबाः पुचः ‘ए’ ल्यू लाःम्ह भारतलिसे कासा म्हिती। त्रिपुरेश्वरय् च्वंगु दशरथ रङ्गशालाय् म्हिगः जूगु कासाय् नेपालं न्हापांगु हाफय् श्रीलङ्काविरुद्ध प्यंगू गोलया अग्रता काःगु खः।

न्हापांगु हाफय् नेपाःया लागि रेखा पौडेलं निगू व सावित्रा भण्डारी (साम्बा) व सविता राना मगरं छगू छगू गोल याःगु खः। सवितां कासाया च्यागू मिनेटय् गोल यानाः नेपाःयात न्ह्यने यकूगु खः। अथे हे, कासाया ११ गु मिनेटय् नेपाःया लागि सावित्रां गोल यासें २–० या अग्रता दयेकूगु खः।

अथे हे, रेखांं कासाया १३ व ३६ गु मिनेटय् गोल यानाः न्हापांगु हाफय् हे नेपाःयात ४–० या अग्रता बिगु खः। निगूगु हाफय् नेपालं निगू गोल जक यायेफत। निगूगु हाफय् अमिशा कार्कीं कासाया ४७ गु मिनेटय् व रश्मीकुमारी घिसिङं कासाया ९४ गु मिनेटय् छगू छगू गोल याःगु खः।

आइतबाः हे पुचः ‘ए’लय् न्हाप जूःम्ह बङ्गलादेश व पुचः ‘बी’ या ल्यू लाःम्ह भुटान दथुइ मेगु सेमिफाइनल कासा जुइ।

Categorized in कासा