नेपाल टेलिभिजन व राष्ट्रिय समाचार समितिइ नेपालभाषाया बुखँ दुथ्याकेगु ऐतिहासिक निर्णय जूगु दु। सञ्चार लिसे सूचना प्रविधिमन्त्री पृथ्वी सुब्बा गुरुङं मन्त्रालय कःघागु सच्छि न्हु दुने यायेमाःगु ज्याय् नेपाल टेलिभिजनय् नेपालभाषां बुखँ बिइगु व राष्ट्रिय समाचार समितिइ नेपालभाषा व मैथली भाषाया बुखँ दुथ्याकेगु नाप रेडियो नेपालय् दनुवार भाषां समाचार दुथ्याकेगु ज्याझ्वः न्ह्यब्बःगु खः।

नेपालभाषां पत्रिका पिहावःगु सच्छि दँ क्यंगु इलय् थुगु ज्याझ्वः जूगु मातृभाषा पत्रकारिता ख्यलय् थ्व छगू महत्वपुर्ण निर्णय कथं काय्माः। नेवाः पत्रकार राष्ट्रिय दबू नं वंगु दच्छि न्ह्यवंनिसे मदिक्क कुतः याना वयाच्वंगु ज्या मध्ये थ्व नं छगू खः। मन्त्री सुब्बाया थुगु निर्णय न मातृभाषा पत्रकारिता यानाच्वपिंत छगू उत्साह थनाबिउगु दु।

मातृभाषा पत्रकारिता भावना जक ज्या यानाच्वंगुलि आः नेपालभाषां समाचार च्वयाः व ब्बनाः सरकारी ज्यां तक याये फइ धइगु समाजय् क्यनेफुगु ज्याक कथं जूगु दु। आः नेपालभाषाया समाचार सरकारया प्यंगू हे संस्था रेडियो नेपाल, गोरखापत्र, नेपाल टेलिभिजन व राष्ट्रिय समाचार समिति थ्यंगु दुसा प्रेस काउन्सिल नेपाल न नेपालभाषा पत्रकार आचारसंहिता प्रकाशन याय्गु ज्या जूगु दु।

नेपालभाषाया समाचार सच्छि दँ दुने देय्या राष्ट्रिय स्तरय् थ्यंगु दु।पत्रकार दबू नं थ्व स्वयां न्ह्यःया संचार मन्त्री रेखा शर्मायात ध्यानाकर्षन याकेगु ज्या जूगु खःसा पृथ्वी सुब्बा गुरुङयात संचार मन्त्री जुइवं हे नेपाल टेलिभिजन व राष्ट्रिय समाचार समितिइ नेपालभाषाया बुखँ दुथ्याकेमाः धका ध्यानाकर्षण याकेगु ज्या जुगु खः । गुगु ज्याय् संचार मन्त्री गुरुङं पुरा यानाबिल।

नेपालभाषाया समाचार तय्गु ज्यायात कया संचार मन्त्री गुरुङयात न्ह्याबलय् लुमकेमाः। लिसे प्रधानमन्त्री केपि शर्मा ओलिया नेतृत्वया सरकारयात नेवाःतय्स लुमकेगु ज्या जूगु दु । थुगु ऐतिहासिक ज्यायात नेवाःतय्स न्ह्याबलय् नं लुमकेगु जुइ।