खुसि मापदण्ड पीडिततय्सं चरणवद्धया आन्दोलन घोषणा याय्गु तयारी
लहनान्युज | ञंलाथ्व पारु ११४४, भाद्र १९ बुधवाः
सर्वोच्च अदालतया परमादेशं पीडित जूपिं व सतक विस्तारं पीडित जूपिसं थौं यल महानगरपालिकाया मेयर चिरिबाबु महर्जनयात ध्यानाकर्षण पौ लःल्हाइगु जूगु दु। संघर्ष समितिया संयोजक सुमन साय्मिया कथं थौं मेयर महर्जनयात ध्यानाकर्षण पौ बीत्यंगु खः। उकथं हे संघर्ष समितिं याकनं हे सहरी विकास मन्त्री प्रकाशमान सिंहयात नापलानाः ध्यानाकर्षण पौ बीगु तयारी जुयाच्वंगु खँ नं संयोजक सुमन साय्मि कनादीगु दु।
थ्व स्वयां न्ह्यः वंगु आइतवाः पीडिततय्सं येँया शान्ति वाटिका छगू ¥याली पिकयाः येँ महानगरपालिकायात ध्यानाकर्षण पौ बिउगु दु । सतक विस्तार पीडित संघर्ष समिति व खुसि मापदण्ड पीडित संघर्ष समितिया संयोजक सुमन साय्मिया नेतृत्वय् वंगु पुचलं येँ महानगरपालिकाया मेयर बालेन साहयात ध्यानाकर्षण पौ बीगु कुतः याःगु खःसां नं मेयर साहं आन्दोलनकारी वइगु सुचं वय्वं हे थःगु ज्याकुथिं पिहां वंगु कारणं यानाः येँ महानगरपालिकाया प्रशासकीय अधिकृत प्रदिप परियारयात ध्यानाकर्षण पौ बिउगु खः।
संयोजक साय्मिया कथं न्हापां प्रशासकीय अधिकृत परियारं नं वय्कःपिंत नापलाय्त अस्वीकार याःगु खः। लिसे प्रमुख प्रशासकीय अधिकृत परियार ध्यानाकर्षण पौ बीत वंपिंत थःपनिगु ध्यानाकर्षण पौ दर्ता यानाः हुँ धकाः धाःगु खः। तर आदोलनकारीतय्सं थःपिं पौ दर्ता याय्त वयागु मखसें ज्याकूया प्रमुखया ध्यानाकर्षण याय्त वयागु खः धकाः धाय्वं तिनि प्रमुख प्रशासकीय अधिकृत परियारं न्याम्ह प्रतिनिधितय्त सःताः नापलाःगु खः।
प्रमुख प्रशासकीय अधिकृत परियारयात नापलाय्गु झ्वलय् सुमन साय्मिं खुसि सम्बन्धी सर्वोच्चया परमादेश लिपा येँ महानगरपालिकां गुगुं नं कथंया अध्ययन मयासें यकःति सुचं पिकाःगु धासें उगु सुचंयात येँ महानगरपालिकां खारेज यानाः सर्वोच्च अदालतया परमादेश विरुद्ध पुनरावलोकन याय्माःगु माग यानादीगु खः। लिसलय् प्रमुख प्रशासकीय अधिकृत परियारं येँ महानगरपालिकां अदालतया आदेशयात पालना जक यानागु खः धासें पीडित जनतायात क्षतिपूर्ति बीगु खँ नं सुचंलय् दुथ्याःगु तर्क यानादीगु खः। लिसलय् आन्दोलनकारीतय्सं क्षतिपूर्ति व मुआब्जा धइगु बिस्कं बिस्कं विषय खः धासें येँ महागरपालिकायाके मुआब्जा बीगु हैसियत दु ला धकाः न्ह्यसः तःगु खः । उकथं हे सर्घष समितिं आम सर्वसाधारण जनतायात उठिबास याय्गु ज्या येँ महानगरपालिकां याय् मजिउ अडान काःगु खः।
¥याली सहित ध्यानाकर्षया पौ बीत येँ महानगरपालिकाया ज्याकुथिं थ्यनेवं दकलय् न्हापां नगरपालिका सुरक्षाकर्मीतय्सं दुमकाय्त स्वःगु खः । तर उमित ख्वाच्वः बिवं तिनि तले छ्वःगु खँ सुमन साय्मि कनादीगु दु । येँ महानगरपालिकायात ज्ञापन पौ बीधुंकाः ¥याली हाकनं उपत्यका विकास प्राधिकरणया ज्याकुथि वनाः अधिकृत नवराज पोखरेलयात नापलानाः सर्वोच्चं क्वःछिउगु खुसिया मापदण्ड खारेज याकेत इनाप यानादीगु खः । लिसें पुचलं प्राधिकरणं रोक्का यानातःगु स्वनिगःया थीथी थाय्या जग्गा फुकुवा याय्माःगु मखुसा मुआब्जा बियाः अधिग्रहण याय्माःगु माग नं याःगु खः । लिसलय् अधिकृत पोखरेलं थ्व विषय थःपिसं अध्ययन यानाच्वनागु व उकिया बारे लिपा जानकारी याकेगु खँ धयादीगु खः । खुसि सम्बन्धी मापदण्डयात कयाः आः संघर्ष समितिं थीथी नगरपालिकायात नं ध्यानाकर्षण पौ बीगु तयारी यानाच्वंगु खँ संयोजक सुमन साय्मि कनादीगु दु । वय्कः सर्वोच्च अदालतया परमादेश विरुद्ध थीथी थासय् खुसिं पीडितत लिसे सहलह जुयाच्वंगु व सहलह लिपा थीथी कथंया आन्दोलना ज्याझ्वः घोषणा याय्गु तयारी जुयाच्वंगु खँ नं कनादीगु दु ।
थ्वहे झ्वलय् येँ महानगरपालिकाया मेयरयात ज्ञापन पौ बीत वंगु खःसां नं वय्कः न्हापां हे ज्याकुथिं पिहां वंगुलिं उकियात कयाः आलोचना शुरु जूगु दु । म्हीग थीथी सामाजिक सञ्जालय् पोस्ट यासें ‘जनतायात हे नाप मलाइगु मेयर छु याय्त’ धइगु न्ह्यसः थनातःगु दु ।
