मिसा भलिबलं ब्यूगु लसता
प्रजित शाक्य | गुँंलागा सप्तमी ११४४, भाद्र १० सोमवाः
थुगुसीया काभा महिला भलिबल धेँधेंबल्ला लिपा नेपाली मिसा भलिबल कासा पाय्छिगु लँपुइ न्ह्यानाच्वंगु क्यंगु दु। काभा नेशन्स भलिबल लिगया फाइनलय् भारतनाप नेपाल निराश जुल। अथेखःसां लिग चरणय् भारतयात बुकाः नेपाःया मिसा भलिबलं थः समर्थकतय्त लय् ताय्कल। दशरथ रंगशालाया कभर्ड हलय् भारतया वर्चस्व सिधय्केत ताःलागुलिं नेपाःया मिसा भलिबल चर्चाया विषय जूगु खः।
लिग चरणय् दक्षिण एसियाया अजय टिम भारतयात नेपालं बुकूगु ऐतिहासिक ई खः। मिसा भलिबलय् नेपालं न्हापांखुसी भारतयात बुकूगु खः। नेपालं फाइनलय् धाःसा न्हापाया प्रदर्शन दोहोरे याय्मफुत। अथेखःसां नेपालया शानदार प्रदर्शनया यानाः फाइनलय् भारतयात दबाबय् तःगु खः।
नेपालं भारतनाप न्यागू सेटया कासा म्हितूगु खः। न्हापांगु स्वंगू सेटय् २–१ न्हापा लाःगु नेपाःयात प्यंगूगु सेटय् हे उपाधि त्याकेगु ह्वःताः चूलाःगु खः। तर ‘बिग म्याच एक्सपोजर’या अभाव हे धाय्फइ लक्ष्य लिक्क थ्यनेवं नेपाली कासामि नर्भस जुल। भारतयात बुकाः च्याम्पियन जुइगु नेपाःया म्हगस पूवने मफुत। उपाधि त्याकूगु जूसा नेपाली भलिबल टिमं थःगु हे भूमि न्हापांगु अन्तर्राष्ट्रिय उपाधि चुलाकीगु खः। अथेखःसां थुगुसि मिसा भलिबल टिमया उत्कृष्ट प्रदर्शनय् सकसिनं गर्व याःगु दु। उपाधि त्याकेधुंकाः भारतीय कासामि कोर्टय् लय्ताया ख्वयाच्वंगु दृश्यं नं नेपाःयात त्याकेत गुलि थाकु धइगु प्रमाणित जूगु दु।
नेपाः लगातार निक्वखुशी भारतयात बुकेत लिक्क थ्यंगु खः। सन् २०१९ य् जूगु १३ औँ दक्षिण एसियाली खेलकुद (साग) य् नं नेपाःया मिसा भलिबल टिमयात अज्याःगु हे नियतिया सामना याय्माःगु खः। उगु इलय् नं नेपालं ‘फिनिसिङ टच’ बी मफुगुलिं भारत भाग्यमानी जुल। शायद उगु कासा लिपा नेपाःया मिसा भलिबल टिमं न्ह्याथेंजाःगु टिमयात नं बुकेफु धइगु विश्वास ब्वलंगु खनेदु।
थुगुसिइ भारत व इरान थेंज्याःगु स्यल्लागु टिमया उपस्थिति दथुइ नेपालं च्याम्पियन जुइगु विश्वास क्यन। नेपाःया मिसा भलिबल पुचलं थ्व विश्वास निराधार मखू धइगु प्रमाणित नं यात। काभा मिसा भलिबलय् नेपालं भारत जक मखु श्रीलंका व माल्दिभ्सयात नं बुकूगु खः। समूह चरणय् धाःसा नेपाल इरानलिसे ३–२ सेटं पराजित जुल। अथेखःसां सेमिफाइनलय् नेपालं इरानयात हे सहज रुपं ३–० सेटं बदला कयाः फाइनलय् थ्यंकेत ताःलात।
थुसिया काभा नेसन्स लिगपाखें नेपालं मिसा भलिबलय् थःगु स्तर उच्चस्तरय् थ्यंगु क्यन। उकिं आः थुगु पुचःयात कयाः सकसितं गर्व यानाच्वगु दु। काभा नेशन्स लिग लिपा नेपाःया मिसा भलिबल कासामि स्टार जुइधुंकूगु दु । उपिं संचार माध्यमयात अन्तर्वार्ता बीत तकं मलानाच्वंगु दु ।
नेपाःया मिसा भलिबल कासामितय्त सरकार व मेमेगु संस्था पाखें थीथी सिरपाःया घोषणा जुयाच्वंगु दु । विशेष यानाः कप्तान अरुणा उप्रेतीलिसें निरुत्ता ठगुन्ना, सरस्वती चौधरी, उषा भण्डारी व सलिना श्रेष्ठया तःधंगु नां जुइधुंकूगु दु। पूनम चन्द, सफिया पुन, सुमित्रा रेग्मी, संगम महतो, कविता भट्ट, कामना बिष्ट, प्रगति नाथ व आरती सुवेदीं नं तःधंगु आशा क्यंगु दु।
थुगुसि टिमय् उत्कृष्ट कासामि मध्ये छम्ह प्रतिभा माली चोटया हुनिं उपस्थित मजूगु खः । अथेखःसां नेपाःया टिम कमजोर खनेमदु।
नेपाःया मिसा भलिबलया प्रगति आकाझाकां जूगु खः धाःसां पाइ मखु। नेपालय् न्हापांगु राष्ट्रिय मिसा भलिबल धेंधेंबल्ला सन् २०३७ स जूगु खः। अन्तर्राष्ट्रिय कासाय् ब्वति काःगु इतिहास स्वय्गु खःसा झिदँ न्ह्यः तक नेपालं बागू दर्जन च्याम्पियनसिप तकं म्हिते फूगु स्थिति मदु। अन्तर्राष्ट्रिय कासाय् म्हितेत नेपाली मिसा भलिबलयात दक्षिण एसियाली खेलकुद (साग) वय्माःगु स्थिति दुगु खः। मिसा भलिबल शून्य अवस्थाय् दुगु खः।
अथेखःसां थीथी क्लबया गठन, विभागीय टिमया साथ व निरन्तर धेंधेंबल्लाःया हुनिं वंगु छगू दशक न्ह्यः तक शून्य अवस्थाय् लानाच्वंगु मिसा भलिबलं तीव्र गतिं प्रगति यात। मिसा भलिबलयात न्ह्यःने हय्त एपीएफ क्लब, नेपाल पुलिस क्लब, त्रिभुवन आर्मी क्लब, पश्चिमाञ्चल व न्यू डायमण्डया नं तःधंगु योगदान दु । घरेलु कासाय् थुपिं टिम दथुइ जुइगु प्रतिद्वन्दीतां बुलुहुँ मिसा भलिबलया स्तर थकाय्गु ज्या यात। थ्व दथुइ नेपालया मिसा भलिबलं काभा नेसन्स लिग निक्वः त्याकेधुंकल। नेपाली मिसा भलिबलं दक्षिण एशियाली खेलकुद (साग) य् नं लगातार पदक त्याकाच्वंग दु।
नेपाल भलिबल संघया बांलाःगु नेतृत्व नं मिसा भलिबलया प्रगतिया जिम्मेवारी खः । भलिबलं संघपाखेँ मिसा भलिबलयात निरन्तर एक्सपोजर बियाच्वंगु दु। घरेलु धेंधेँबल्ला नं यक्व जुयाच्वंगु दु। अथेखःसां मिसा भलिबलया विकासया हाथ्या कथं अझ नं छंगू आधुनिक रङ्गशाला व कासामितय्त आर्थिक रुपं बल्लाकेगु माःगु दु।
