यल नेवाः समाज नीस्वंगु दछि फुनाः निदँय् क्यंगु दु। नेवाः समुदायया नीछगू जाति छगू हे संरचना दुथ्याइ कथं यल नेवाः समाज स्थापना जूगु खः।

यलयात मू कार्यक्षेत्र दयेकाः क्रियाशील जुयाच्वंगु थीथी जातीय समाजया संस्थागत प्रतिनिधिमूलक संगठनया रुपय् दछि न्ह्यः यल नेवाः समाज थापना जूगु खः। समाजय् कर्माचार्य, कपाली, खड्गी, चित्रकार, ज्यापु, जोशी, तण्डुकार, ताम्रकार, द्यःला, नकःमि, नापित, वँद्यकार, बाराही, बौद्ध विहार संघ, रजक समाज, रञ्जितकार समाज, राजोपाध्याय समाज, स्यस्यः समाज, सिकःमि समाज व शिल्पकार समाज आवद्ध जुयाच्वंगु दु। नेवाः समाजं दछियंकं याःगु थीथी ज्याझ्वलं नेवाः धइगु मंकाः भावनायात तिबः बिउगु दु।

नेवाः समुदाय दुनेया थःथःगु जातिया चाकलय् संगठित जुयाच्वंगु स्थितिइ ईया माग कथं थापना जूगु यल नेवाः समाजं नेवाः दुनेया विविधतायात कःघानाः मंकाः मञ्चया नेवाःतय्गु मुक्कं मुद्दा ल्ह्वनेफइगु विश्वास समाजं कयाच्वंगु दु । यलय् गाबहालस्थित कुमारी पार्टी प्यालेसय् ग्वसाः ग्वःगु ज्याझ्वलय् शहरी विकास मन्त्री प्रकाशमान सिं लिसे बागमती प्रदेशया सांसद रामकृष्ण चित्रकार, यल महानगरपालिकाया उपमेयर मञ्जरी शाक्यं नेवाः समाजं ल्ह्वनेत्यंगु मुद्दायात बः बियादीगु खः।

नेवाः समाज दुनेया विविधतायात छधि यानाः समाजयात बल्लाकेगु लिसे विकसित याय्माःगु खँय् सकलें पाहांपिसं बः बियादीगु खः। ज्याझ्वलय् न्ववाय्गु झ्वलय् उपप्रधानमन्त्री सिंह नेवाः समाजयात जीवन्त व अझ क्रियाशील याय्माःगु खँय् बः बिसें उकिया नितिं सरकार माःगु ग्वाहालि याय्गु प्रतिबद्धता प्वकादीगु खः।

उकथं हे बागमती प्रदेशसभाया दुजः चित्रकारं नेवाःत जाय् मफइगु अवस्था वल धाःसा राजनीतिक, प्रशासनिक लगायत क्षेत्रय् लिउने लाइगु जक मखुसें थःगु अधिकारपाखे बन्चित जुइ मालेफइगु धयादीगु खः। उकथं हे उपमेयर शाक्यं नेवाः दुनेया विविधतायात नालाः छप्पँ जुयाः न्ह्याःवनेमाःगु खँ धयादीगु दु।

उकथं हे ज्याझ्वलय् समाजया नायः ताम्रकारं थःगु जाति दुने न्ह्याना वयाच्वंगु संस्कार, रितिरिवाजया संरक्षणया लिसे नेवाः समुदायया हकहित, नेपालभाषा संरक्षण, संस्कृति व परम्परा ल्यंकेत बिस्कं बिस्कं रुपय् नीस्वनातःगु संगठनयात छधि यानाः न्ह्याःवनेगु नितिं समाजं ज्या याना वयाच्वंगु खँ धयादीगु दु।

नेपालभाषा मंका खलःया ग्वसालय् दँय्दसं जुइगु भिन्तुना ¥यालीया संयोजन याय्गु, सरकारं २०७५ सालय् प्रस्ताव याःगु गुथि विधेयक विरुद्धया आन्दोलन, २०७७ साल भदौं १८ गते बुंगद्यः पुच्वः सालेगु झ्वलय् जूगु झडपया घटना लिपा संगठनयात थःगु जातीय संगठनया घेरां पिहां वयाः सोचे याय्माःगु, नापं जाय्माःगु व मिले जुयाः ज्या याय्माःगु अवस्था ब्वलंगु खँ नं अध्यक्ष ताम्रकारं धयादीगु दु।

थीथी घटनाक्रमं बिउगु सन्देशयात मथुइकेगु खःसा लक्ष्य, हकहितया एजेण्डायात सम्बोधन याकेगुलिं लिउने लाय्फइगु अवस्था ब्वलनेवं फुक्कं जाति समाज न्ह्यनिगु यल नेवाः समाज नीस्वनेमाःगु खँ नं अध्यक्ष ताम्रकारं कनादीगु दु।थीथी जातीय समाज दथुइ पारस्पारिक सद्भाव व साझेदारीइ समुन्नत समाज दय्केगु समाजया मू प्रस्तापना खः। समाजया आज्जु कथं यलया मूर्त, अमूर्त संस्कृति, सम्पदाया जर्गेना याय्गु व नेपालभाषाया प्रवद्र्धन यायेगु मू आज्जु तयातःगु दु।