युरो च्याम्पियन स्पेन
प्रजित शाक्य | दिल्लागा चौथी ११४४, सावन १० बिहीवाः
फुटबलय् गबलें गबलें बिचाः विभाजित जुइ। तर स्पेनं युरो २०२४ या उपाधि त्याकूबलय् सकसिनं छप्पँ जुयाः धाल – स्पेन थ्व कासाया उत्कृष्ट टिम खः अले थ्व स्पेनया निंतिं अजूचायापुगु उपाधि खः। इंग्ल्यान्डया उपविजेता प्रशिक्षक ग्यारेथ साउथगेटं नं स्पेन च्याम्पियन जुइत हकदार जूगु स्वीकार याःगु दु।
थुगुसी स्पेनं न्हापांगु कासानिसें फाइनलतक युरोय् प्रभुत्व कायम यानाः त्याकूगु खः। फाइनलय् स्पेनं इंग्ल्यान्डयात २–१ गोलं बुकूगु खः। युरोपेली च्याम्पियनसिपय् छगू टिमं टाइब्रेकर मम्हितेक न्ह्यय्गू हे कासा त्याकूगु थ्व न्हापांगुखुसि खः।
फाइनलय् त्याकूलि हिरो धाःसा अप्रत्याशित रुपं माइकल ओयेरजाबाल जूगु खः । निर्धारित ई क्वचाइगु प्यंगू मिनेट न्ह्यः हे माइकलं गोल याःगु खःसा इंग्ल्यान्डं कासाय् हिस्स यानाः अतिरिक्त ई क्वचायेकूगु खः। कासाया निगूगु मिनेटय् निको विलियम्सं लामिने यमलया गोल यासें स्पेनयात न्ह्यने यकूगु खः। कासाया ७३ गू मिनेटय् इंग्ल्यान्डया कोल पाल्मरं बराबरी गोल याःगु खः।
थ्व कीर्तिमान सन् २०१० य् स्पेनं विश्वकप त्याकूगु प्यक्वःगुखुसि खः। उकिं युरोपेली फुटबलय् दकलय् सफल देय् स्पेन जूगु दु। थ्वसिबें न्ह्यः स्पेन व जर्मनी बराबरीइ लाःगु खः। सन् २०१२ लिपा न्हापांखुसी स्पेनं उपाधि त्याकूगु खः। उगु इलय् स्पेनं सन् २००८ व २०१२ य् युरो व सन् २०१० य् विश्वकप त्याकूगु खःसा लगातार स्वक्वः तःधंगु उपाधि त्याकूगु कीर्तिमान नं स्पेनं त्याकूगु खः। सन् १९६४ य् न्हापांखुसी स्पेन युरोपेली च्याम्पियन जूगु खः।
उपाधि कासाय् थ्यनेगु झ्वलय् स्पेनं पूर्व च्याम्पियन इटाली, जर्मनी व फ्रान्सया लिसें विश्वकपय् स्वंगूगु थासय् लागु क्रोएसिया व इंग्ल्यान्डयात बुकूगु खः। स्पेनयात उपाधि त्याकेगुलि कासामिपि छप्प जुया म्हितूगु खः। तर विशेष यानाः रोड्री, युवा सेन्सेशन लामिने यमल, स्ट्राइकर दानी ओल्मो व युवा विन्गर निको विलियम्स चर्चा जुगु खः। कासाया उत्कृष्ट कासामि कथं रोड्री ल्यःगु खः । ओल्मों मंकाः रुपं गोल्डेन बुट त्याकूगु खः। फाइनल जुइगु छन्हु जक न्ह्यः १७ दँ थ्यंम्ह यमल थुगु कासाया उत्कृष्ट युवा कासामि कथं ल्यःगु खः। यमलया नं दकलय् अप्वः असिस्ट जूगु खः । निकों फाइनलय् न्हापांगु गोल याःगु खः।
थ्व कासा न्ह्यः उपाधिया नितिं इंग्ल्यान्ड व फ्रान्सया मू दाबेदार कथं कयातःगु खः। स्पेनयात थुगुसी न्हापा थें मू मब्यूगु खः। स्पेनया गोल्डेन जेनेरेशन युरो २००८, २०१२ व विश्वकप २०१० त्याकूगु इलय् खः। थुगुसी स्पेनिस टिमय् क्रिस्टियानो रोनाल्डो, ह्यारी केन, काइलियन एमबाप्पे थेंज्याःपिं तःधंगु नां मदुगु खः। यमल, निको, ओल्मो थेंज्याःपिं युवा कासामिपिन्त थाय् बियाः जर्मनी वःगु खः। उकिं थज्याःगु टिमं युरोकप त्याकी धकाः विश्वास यायेत यक्व हे आँट माःगु खः। तर विश्वकप, युरोकप थें जाःगु ततःधंगु फुटबल धेंधेंबल्लाः जुइबलय् स्पेनया फ्यानत जक मखु, हलिंन्यंकया फ्यानतय्सं न्ह्यावलय् स्पेनपाखें छगू उपाधि त्याकिइगु भलसा कायेगु याइ। स्पेनं थुगुसी नं अज्जु चाइपुगु कथं म्हितीइ धका भलसा काःगु खः।
थुगु कासाय् यमल व निको थेंज्याःपिं युवा कासामिपिं सुपरस्टार जुयाः पिहां वयाः स्पेनया निंतिं उपाधि त्याकेत महत्वपूर्ण भूमिका म्हितूगु खः। स्पेनं दक्को कासाय् थःगु दबाव बिगु खः। उपाधि त्याकेगु झ्वलय् स्पेनं मुक्कं १५ गोल याःगु खः। गुगु युरोय् छगु रेकर्ड न जूगु दु।
अथे हे स्पेनया त्याकेगु झ्वलय् ६३ दँया प्रशिक्षक लुइस डे ला फ्युएन्टेयात बिल धाःसां छुं खँ मदु। सन् २०२२ निसें स्पेनिस टिमया व्यवस्थापन यानाच्वंगु खः। वं थःगु प्रशिक्षणय् स्पेनयात युइएफए नेसन्स लिग, युरो अन्डर १९ व युरो अन्डर २१ च्याम्पियन याये धुंकूगु दु।
इंग्ल्यान्डं हाकनं अण्डरएचिभमेन्ट टिमया ट्याग चीके मफुत। फुटबलया जन्मभूमि इंग्ल्यान्ड लिपांगु संस्करणय् नं फाइनलय् पराजित जूगु खः। इंग्ल्यान्ड युरोय् लगातार निगू फाइनलय् पराजित जूगु न्हापांगु टिम जूगु दु। थुगुसी इंग्ल्यान्डं फाइनलय् थ्यंकूसां नं न्हापा थें आकर्षक फुटबल म्हिते मफुत। उकिं कासाया झ्वलय् इंग्ल्यान्डया टिम व प्रशिक्षकया समर्थकतय्सं आलोचना याःगु खः सन् १९६६ य् त्याकूगु विश्वकप हे इंग्ल्याण्डया छगू जक प्रमुख उपाधि खः। उगु इलय् निसें न्ह्याबलें दाबेदार जुयाच्वंसां इंग्ल्यान्ड निराश जक जुइमाःगु दु।
अर्जेन्टिनायात कोपा उपाधि
थुगुसी युरो कप व फुटबलया निंतिं नांजाःगु मेगु महादेश दक्षिण अमेरिकाया दकलय् तःधंगु फुटबल कासा कोपा अमेरिका नं उगु हे इलय् जूगु खः। थुगुसी कोपा अमेरिकायात युरो कपं पूवंक हे त्वपुयाबिल। थुकिं युरो कपया गौरव नं क्यनाच्वंगु दु। तर अर्जेन्टिनां उपाधि त्याकेवं कोपां फाइनलया चर्चाय् युरोकपया फाइनलयात प्रतिस्पर्धा याःगु खः। थ्व निगुलिं फाइनल छन्हु हे जूगु खः। अर्जेन्टिनां अतिरिक्त इलय् कोलम्बियायात १–० गोलं बुकाः अर्जेन्टिनां कोपा अमेरिका त्याकूगु खः।
११२ गु मिनेटय् लाउटारो मार्टिनेजं गोल यासें अर्जेन्टिनाया झींखुक्वः तक कोपा अमेरिका उपाधिय त्याकूगु कीर्तिमानी जूगु दु। उगु गोलया लिसें मार्टिनेज नं मुक्कं ५ गोल यानाः थुगु कासाया शीर्ष गोलयाम्ह जूगु खः। अर्जेन्टिनाया थ्व लगातार स्वंगूगु प्रमुख उपाधि खः। थ्वः सिबें न्ह्यः अर्जेन्टिनां २०२१ य् कोपा व २०२२ य् विश्वकप त्याकूगु खः। विश्वया तःधंम्ह फुटबलर लियोनल मेस्सीं थःगु नेतृत्वय् थ्व स्वंगू कासाय् अर्जेन्टिनायात च्याम्पियन दयेकूगु दु
