वाङमय शताब्दि पुरुष सत्यमोहन जोशीया च्वसां पिदंगु “बैद्य बा” नांयागु प्याखं आः संकिपाया कथं पर्दाय् वइगु जूगु दु। यलया नांजाम्ह साहित्य अन्वेषक भाषाविद् पन्ना प्रसाद जोशीया जीवनया छगू घटना लिसे स्वापु दुगु थुगु प्याखंयात शान्तराज शाक्यं संकिपाया कथं दयेकादीगु दु।

नेपाः देयया इतिहास व सांस्कृतिकतां जाःगु “गुरुमापा” व “यलय बाथ” थेंजागु नेवाः संकिपा दयेकादी धुंकुम्ह शान्तराज शाक्यया निर्देशनय् आः “बैद्य बा” पिहावइगु जूगु दु। थुगु संकिपाय् शरद कसाः भाजुं बैद्य बाया मू भुमिका म्हिता तःगु दुसा वयक नापनापं पुर्णिमा शाक्य, नबिन थेच्वमि, धर्मकृष्ण श्रेष्ठ, सोनी श्रेष्ठ, हिक्मत श्रेष्ठ व मचा कलाकार श्रीज्ञा शाक्य लगायत आपालं कलाकार पिन्सं थीथी भुमिकाय् अभिनय यानातःगु दु।

संकिपाया किपालुमि सिद्धार्थ शाक्य व संजोग श्रेष्ठ, सम्पादन संजीवन शाक्य व सह निर्दशक कृष्ण प्रजापति खः। शताब्दि पुरुष जोशीया नाट्य कृति “बैद्य बा” या संकिपाया रुपय् शान्तराज शाक्यं च्वयादीगु खः। लोक साहित्य परिषदया निर्माण कथं तयार जूगु थ्व संकिपाया निर्माण व्यवस्थापक राजित बहादुर श्रेष्ठ खः।

Categorized in मनोरन्जन