प्रधानमन्त्री केपी शर्मा ओलीं प्रतिनिधिसभाया आइतबाः च्वंगु बैठकय् नेपाली कांग्रेस व नेकपा एमाले दथुइ जूगु न्ह्यय्गू बुँदे सहमतिया घोषणा यानादीगु दु।

वय्कलं प्रतिनिधिसभाया बैठकय् विश्वास प्रस्ताव न्ह्यब्वयेगु झ्वलय् निगू दल दथुइ न्ह्यय्गू बुँदे सहमतिया घोषणा यानादीगु खः। सहमति कथं न्हापांगु चरणय् एमाले सभापति ओलीं निदँ तक सरकारया नेतृत्व याइगु व वयां लिपा कांग्रेस सभापति शेरबहादुर देउवां २०८४ या कार्तिकय् जुइगु चुनावतक सरकारया नेतृत्व याइगु जूगु दु।

प्रधानमन्त्री ओलीं घोषणा यानादीगु न्ह्यय्गु बुँदे सहमति थुकथं दु

१. आम जनताया चाहना कथं राष्ट्रिय हितया रक्षा यायेगु, भ्रष्टाचारयात नियन्त्रण यानाः देशय् सुशासन कायम यायेगु, राष्ट्रया विकास अभियानयात तीव्रता बिइगु, संविधानया धारा ७६ (२) कथं संलग्न यानाः राष्ट्रिय सहमतिया सरकार निर्माण यायेगु राजनीतिक स्थिरताया निंतिं मेमेगु राजनीतिक दल सहमति यायेगु

२. राष्ट्रिय सहमति सरकारं संविधान न्ह्यायेधुंकाः व्यवहारय् खनेदूगु शक्ति व कमजोरी व जटिलतायात समीक्षा याइ, अले संविधानय् माःगु संशोधन व राजनीतिक स्थायित्वया निंतिं पाय्छिगु कानून निर्माणयात प्राथमिकता बीइगु।

३. अर्थतन्त्रय् विद्यमान शिथिलतायात क्वचाय्का आर्थिक गतिविधियात दिगो यायेत विश्वसनीय व्यापारिक वातावरण दयेकेगु, आन्तरिक व बाह्य लगानीयात प्रोत्साहन यायेगु व देय् दुने पर्याप्त व मर्यादित रोजगारी सिर्जना यायेगु।

४. राष्ट्रिय सहमतिया सरकारया नेतृत्व नेकपा एमालेया अध्यक्ष केपी शर्मा ओलीं सरकार गठनया दिं निसें निदँ व वयां लिपा २०८४ कार्तिकय् जुइगु आम निर्वाचनतक कांग्रेस सभापति शेरबहादुर देउवाया नेतृत्व याइगु जूगु दु।

५. राष्ट्रिय हितया रक्षा यायेगु, भ्रष्टाचारयात नियन्त्रण यानाः देशय् सुशासन कायम यायेगु, राष्ट्रया विकासया अभियानयात तीव्रता बीगु, राष्ट्रिय सहमति व न्यूनतम मंकाः ज्याझ्वः सरकारी संचालनया आधार दयेकाः उकी हे सरकार चले यायेगु आधार।

६. राष्ट्रिय सहमतिया सरकारया नितिं निगू प्रमुख राजनीतिक दलया नेतृत्वया भूमिका व समानताया आधारय् उमिसं समान आधारय् सरकारय् ब्वति काइ अले मेमेगु राजनीतिक दलयात नं सरकारय् दुथ्याकी।

७. राष्ट्रिय सहमतिया सरकारया भावना व भावना कथं प्रादेशिक सरकार गठन व संचालन यायेगु व जनभावना अनुरुप प्रादेशिक व स्थानीय तहलय् विकास निर्माणया ज्यायात तीव्रता बिइगु।

Categorized in राजनीति