येँ महानगरपालिका वडा नम्बर २२ या वडाध्यक्ष चिनिकाजी महर्जनं सतकय् टेबुल मेच तयाः वडाया ज्या न्ह्याकादीगु दु।

महानगरं न्हू सतक फुटपाथ दयकेगु ज्याया निर्णय लित मकाःतले वडाया ज्या सतकं हे यायेगु धासें वडा २२ या वडा अध्यक्ष महर्जनं सतकं हे ज्या न्ह्याकादीगु खः वडा अध्यक्ष महर्जनं फुटपाथ विस्तारया निर्णय लितमकातले महानगरयात दबाब बिइगु कथं सतकपाखें हे वडाया ज्या न्ह्याकागु खः धका धयादीगु दु।

नेपाल बैंक वनेगु लँय् धर्नाया नितिं दयेकूगु पाल दुनेंनिसें हे ज्या न्ह्याकूगु खः। वडा अध्यक्ष महर्जनं धयादीगु दु, “महानगरया फुटपाथ विस्तार यायेगु निर्णय लित मकाःतले सतकं हे २२ गू वडाया फुक्क ज्या न्ह्याकेगु जुइ ।” धका धयादीगु खः।

महानगरं न्हूगु सतकया सतक चिब्या यानाः फुटपाथ तब्या यायेगु ज्या न्ह्याकूगु धासें वडाध्यक्ष महर्जनलिसें स्थानीयबासीं विरोध याःगु खः। वंगु बुधवाःनिसें फुटपाथ दयकेगु ज्या न्ह्यागु खःसा शुक्रवाःनिसें स्थानीयबासीं बिरोध याःगु खः।

महानगर थौं सुथय् डोजर लित यकूगु खः।

Categorized in राष्ट्रिय