हलिउड अभिनेता जोनी डेप २०२२ य् न्हापाम्ह कलाः एम्बर हर्ड विरुद्ध जूगु मानहानि मुद्दां बांमलाक लिच्वः लाकूगु खः। अदालतया समर्थन व सावर्जनिक समर्थन नितां त्याकेवं सकसिगु ध्यान जोनी डेपपाखे वःगु खः।

उगु घटना लिपा अभिनेता डेप बेलायतय् शान्त जीवन हना वयाच्वंगु खः। आः वयागु डेटिङ जीवनय् छुं न्हूगु खँ वःगु दु। जोनी २८ दँया रुसी मोडल व ब्यूटिशियन युलिया व्लासोभालिसे ‘क्याजुअल रिलेशन’ य् दु।डेलीमेलं निम्ह दथुइ मतिना दस धका बुखँ च्वःगु खः। नकतिनि जक सार्वजनिक थासय् ल्हाः ज्वना न्यासि वनाच्वंगु किपा पिहावःगु खः।

डेप लिक्कया कथं इपिं निदँ न्ह्यःनिसें नापलायेगु ज्या जुयाच्वंगु खः। छु दिं न्ह्यः जक लण्डनया हेलिपोर्टय् थुपिं निम्ह नापं खनेदूगु खः। व्लासोभां चेक गणराज्यया राजधानी प्रागय् मेकअप व हेयरस्टाइल स्टुडियो चले यानाच्वंगु खः। उपि दथुइ २०२१ य् ५५ क्वःगु कार्लोभी भ्यारी अन्तर्राष्ट्रिय संकिपा महोत्सवय् नापलागु खः।

Categorized in मनोरन्जन