पर्यटनया सम्भाव्यता दुगु टिष्टुङ्ग रिर्सोट
सुनिता महर्जन | दिल्लाथ्व द्धादशी ११४४, साउन १ मंगलवाः
स्वर्ग स्वय्गुसा नेपालय् वनेमाः धइगु विदेशीतय्गु धापु जिपिं टिष्टुङ्ग वनाः मनन यानाः। खय्त ला नेपाः देय्यात हलिमय् खुल्ला म्यूजियमया रुपय् कायेगु याः। नेपाः धार्मिक, साँस्कृतिक, पर्यटकीय ल्याखँ आपालं मनुतय्सं यय्का च्वंगु दु। थुकि मध्ये छगू थाय् खः टिष्टुङ्ग। येँ नं उलि तापा मजू। पर्यटकतय्गु नितिं आपालं वैकल्पिक मार्ग दु टिष्टुङ्ग वनेगु। थुकि मध्ये दकलय् चिहाकःगु लिसे चलनचल्तिय् वयाच्वंगु लँ खः चन्द्रागिरी, चित्लाङ्ग जुयाः टिष्टुङ्ग वनेगु। मेगु लँ धैगु फपिं मार्खु जुयाः चित्लाङ्ग जुयाः टिष्टुङ्ग थ्यंकेगु खः। उकथं हे लँ धइगु भचा ताहाकगु लँ थानकोट, नागढुङ्गा नौबिसे जुयाः त्रिभुवन राजमार्ग जुयाः टिष्टुङ्ग थ्यंकेगु। टिष्टुङ्गया आर्कषण धइगु नेवाःतय्गु थाय् कुन्छाल, वज्रबाराही द्यः, न्यागु व न्ह्यगु हिति खःसा आ वयाः छगु मेगु आकर्षणया केन्द्र धइगु टिष्टुङ्ग रिर्सोट।
टिष्टुङ्ग वनेबलय् चित्लाङ्गया प्राकृतिक सौन्दर्य व सांस्कृतिक सम्पदा स्वयाः आनन्द काय्फइ। चित्लाङ्गया मू आकर्षण धइगु न्हय्गू हिति, स्वछन्द भैरव, तलेजु भवानी, अशोक चैत्यया नाप नापं आपालं बांलाःगु थाय् दु। मेगु धाय्गु खःसा चित्लाङ्गया पुलागुं बस्ति, दुगुया चीज फार्म पालुङ्ग, दामन, मार्खु, कुलेखानी आदि थाय् थनया मू आर्कषण खः।
थ्वपालय् नेवाः पत्रकार राष्ट्रिय दबूया पूर्ण बैठकया नितिं टिष्टुङ्ग च्वनेगु क्वःछिउगु खः। लछि न्ह्यः हे दबूया पूर्ण बैठक टिष्टुङ्गय् च्वनेगु निर्णय जूकथं केन्द्रीय समितिया दुजःपिं लिसे सल्लाहकार सहित बैठक च्वनेगु झ्वलय् जिपिं अन थ्यंगु खः । दबूया अध्यक्ष नृपेन्द्रलाल श्रेष्ठया नेतृत्वय् वनागु निन्हुयंकंया भ्रमण पूर्ण रुपय् तालाःगु दु। असारया महिनाय् वा वयाच्वंगुलिं लँ गज्याःगु दु धइगु आशंकाया दथुइ गुलिखे पासापिसं भ्रमण रद्द यायेगु खः कि धइगु प्रस्ताव नं वःगु खःसां टिष्टुङ्ग भ्रमणया छन्हु न्ह्यः तक विशेष कारणं न्हापा हे बैठकय् वयेमखु धकाः सुचं बिउपिं बाहेक बहुमत दुजःपिसं टिष्टुङ्ग भ्रमणय् वनेत उत्साहित जूगुलिं अन्ततः वनेगु खँ क्वःजित।
तर जिपिं येँ वनेगु न्हि असार २८ गते सुथंनिसें वा वःगुलिं गुलिखें पासापिं ग्यानाः सुचं हे मबिउसें मवल। येँया ताम्सिपाखाय् मुनाः सुथसिया ७ बजे न्ह्याःगु यात्रा कलंकी, चन्द्रागिरी जुयाः चित्लाङ्ग थ्यंनेवं तसकं उत्साहित जुया । लँय् खने दुगु न्ह्याइपुगु लू स्वस्वं पासापिसं अतिक लय्ताल । जिपिं चित्लाङ्गय् थ्यनेधुंकाः पलख कौला यायेगु लिसे अनया प्राकृतिक सम्पदाया रुपय् दुगु न्हय्राहिति चालिलेत वना। ख्वाउँगु मौसमय् किपाः कयाm न्ह्यइपुके धुंकाः जिपिं ११ बजेपाखे टिष्टुङ्ग रिसोर्टपाखे न्ह्याःवना।
चिबालागु लँ न्ह्याःगु जिमिगु ल्यँ दनिगु यात्राय् अन यानातःगु बुँज्या खनाः पासापिं तसकं उत्साहित जूगु खना। जिपि लिसे यात्राय् ब्वति कयादीम्ह नेवाः मिडिया प्रा.लि.या अध्यक्ष लिसे टिष्टुङ्ग रिसोर्टका संचालक सन्तकुमार महर्जनयाके लँया बारे न्यनेगु झ्वलय् रिसोर्ट वनेगु मू लँ बज्रबाराही देगः न्ह्यःनेया लँपु जुयाः वनेमाःगु खःसां नं अनया लँ तबलाः यायेगु ज्या जुयाच्वंगुलिं वैकल्पिक लँपुं वयागु खँ कनादिल । वय्कलं टिष्टुङया पुलांगु दरवार जुयाः वनेगु खःसा लँ थ्व स्वयां बांलाःगु खँ कनादिल । तर वा वयाच्वंगुलिं यानाः कच्ची लँया अवस्था उलि बांलाः मजू। जिपिं च्वनेगु रिसोर्ट थ्यने न्ह्यः थस्वाःगु पाखा दुगुलिं बस यंके मफयेवं जिपिं न्यासी वनेमाःगु जुल। अनं थ्यंमथ्यं न्यागू मिनेटं जिपिं रिसोर्ट थ्यन । लँय् ह्वयाच्वगु स्वां सिमा लिसे सयाच्वंगु इसी स्वयां पासापिं लिसे न्यासिवनेगु नं न्ह्यइपुसे च्वं खनि।
रिसोर्ट दुहां वनेवं वाउँसें च्वंगु थाय् दथुइ थीथी कथंया स्वां ह्वयाच्वंगुलिं व किपाः कायेत दयेकातःगु थाय् खनाः मन हे लय्ताल जि, अनिता, रचना तता व रवि दाई न्हापां थ्यनाः अनया लसक स्वयेखन । दुने सफा थासय् भुतुली जिमित जा नयेगु नितिं च्वनेगु व्यवस्था यानातःगु । पलख चाःहिलेगु तःधंगु ख्यःया दथुइ वाउँसे च्वंगु चकंगु थाय् दु तखागु निखा छेँ, चीकूगु कोठा दुगु छखा छेँ व निगू कटेज दयेकातःगु दु । मिटिङ्ग हल निसे खुम्ह तक द्यःने जिउगु कोठा व निम्ह स्वम्ह द्यःने जिउगु कोठा नं दु। अन दयेकातःगु थीथी कोठाया नां टिष्टुङ्गया प्राचीन बस्तीया नां बियातःगु दु।
रिसोर्टय् थ्यनेधुंकाः पलख आराम याना। वयां लिपा जा नयेत मिटिङ हलपाखे वना। बैठक हलयात टिष्टुङ्गया मू आकर्षणया केन्द्र बज्रबाराही द्यःया नामय् ‘बज्रबाराही हल’ धकाः नां बियातःगु दु । दबूया पूर्ण बैठक थ्यंमथ्यं न्याघौ तक जुल । सहलहया झ्वलय् वंगु निलाति न्ह्यः क्वचाःगु न्हापांगु अन्तर्राष्ट्रिय मातृभाषा सम्मेलनया समिक्षा यायेगुया लिसे दबूया भावी योजनायात कयाः सहलह ब्याकेगु ज्या जुल। वयां लिपा पासापिं न्ह्यइपुकेगु नितिं गुलिं म्ये हालेगुलिं सा गुलिं प्याखँ हुइगु धुंकाः बहनिया बेली नयाः आराम यायेगु ज्या जुल।
निन्हुकुन्हु नेपाल पर्यटन बोर्डया डाइरेक्टर मणि लामिछाने लिसें टिष्टुङ्ग रिसोर्टया सल्लाहकार, समाजसेवी लक्ष्मण गमाल व संचालक एवम् नेवाः मिडिया प्रा.लि.या अध्यक्ष सन्तकुमार महर्जनलिसे टिष्टुङ्गया पर्यटकीय विकासयात कयाः अन्तक्र्रियात्मक ज्याझ्वःया ग्वसाः दुग खः । पर्यटन बोर्डया डाइरेक्टर लामिछानें चित्लाङ्ग टिष्टुङ्गय् पर्यटन दुकायेगु नितिं स्थानीय ग्वाहालि कयाः विकास यायेत झिदँ बिउगु व आः वयाः थुगु थाय्यात कयाः प्रचार प्रसारं गतिकाःगु बिचाः प्वंकादिसें पर्यटक दुकायेगु नितिं नेवाः पत्रकार दबूया ग्वाहालिं यानाः वइगु दँय् अझ अप्वः पर्यटक वइगु खँ कनादिल।
समाजसेवी गमालं थःगु चित्लाङ्गय् बूसां नं ब्यापारया सिलसिलाय् सुइदँ न्ह्यवंनिसें येँय् लाखाछेँ संचालन यानाच्वनागु लिसे टिष्टुङ्गय् शिक्षाया विकासया नितिं थःगु अध्यक्षताय् छगू विद्यालय संचालन यानाच्वनागु खँ कनादिसें टिष्टुङ्गय् रिसोर्ट संचालनया मू आज्जु धइगु स्थानीय जनशक्ति पिने वनाः ज्या याः वने म्वालेमाः धइगु बिचाः तयादीगु खः । उकथं हे वय्कलं टिष्टुङ्गया उत्पादन आलु, लैं व काउली जुयाच्वंगु व उकिया बजाः येँय् जूगु जुयाच्वंगु खँ नं कनादिल।
उकथं हे नेवाः मिडिया प्रा.लि.या अध्यक्ष महर्जनं चित्लाङ्ग व टिस्टुङ्ग लिसे ज्यापु संस्कृति विकास कोषपाखे बाजा इनेगु ज्या न्ह्याःगु खँ कनादिल । वय्कलं थः बाजा इनेगु नितिं गाडी ज्वनाः वयाबलय् टिष्टुङय् थ्यनेधुंकाः च्वनेगु थाय्या समस्या जुइधुंकाः थन चाःहिउ वइपिं पर्यटकतय्त बासया व्यवस्था यायेगु खःसा थम्हं शेयर कायेगु बचं बीधुंकाः स्थानीय विनोद महर्जनं टिष्टुङ्ग रिसोर्टया प्रस्ताव हयेवं थम्हं लगानी यानागु व खुदँया दुने झिंप्यम्ह पासाििपं जानाः १० करोड तका लगानी यायेधुनागु खँ कनादिल । लिसे रिसोर्टय् वइपिं पर्यटकया सुझाव कथं २०८१ साल दुने स्वीमिङ्ग पुल दयेकेगुया लिसें वाकिङ्ग पथ दयेकेगु योजना नं कनादीगु खः। थ्यंमथ्यं ३४ रोपनी जग्गाय् न्यनाच्वंगु रिसोर्टय् कृषी उत्पादन यायेगु ज्या नं जुयाच्वंगु दु।
दबूया अध्यक्ष नृपेन्द्रलाल श्रेष्ठं टिष्टुङ्गया लसक मेथाय् स्वयां बिस्कं जूगुलिं थन आन्तरिक व बाह्य पर्यटक हयेत नेवाः पत्रकार दबूं ग्वाहालि यायेगु खँ कनादिल । रिसोर्टय् स्थानीय म्हसिका ब्वयेबहःगु खँय् म्होति जूगु धासें वय्कलं चित्लाङ्ग व टिष्टुङ्गया पहिचान खनेदयेमाःगु सुझाव बियादीगु खः । लिसे वय्कलं स्थानीय लोकल ब्राण्डया त्वँसा व स्थानीय खानाया व्यवस्था जूसा अझ बांलाइगु सुझाव बियादिल।
लिसें दबूया बरिष्ठ उपाध्यक्षं सुनिल महर्जनं हाइकिङ्गया व्यवस्था लिसे स्थानीयं खपट याइगु कृषि सामाग्रीयात प्राथमिकता बीमाःगु, म्युजिक भिडियो छाँयाकन यायेगु, संचार माध्यमया ध्यान सालेत पर्यटन बोर्ड लिसे समन्वय यायेमाःगु सुझाव नं बियादीगु खः।
दबूका सहसचिव प्रजित शाक्यं टिष्टुङ्गय् पर्यटक दुत हयेगु मेगु उपाए स्पोटर्स टुरिजम नं विकल्प जुइ फइगु धासें छगू कासाय् खेलाडीया लिसें द्वलंद्वः मनूतय्सं ब्वति काइगु जुयाः भलिबल व साइकिलिङ्ग थेंज्याःगु कासाया ग्वसाः ग्वयेत पर्यटन बोर्डया ग्वाहालि कयाः थप पर्यटन हयेफइगु सुझाव बियादीगु खः।
महासचिव के के मानन्धरं पर्यटन व्यवसाय ब्वलंकेत पेसाय् हे रुपान्तर यायेमाःगु व स्थानीय उत्पादनयात प्रचार यानाः थप ज्या यायेफइगु खँ धयादिल। उकथं हे वय्कलं पर्यटन
विकासया नितिं लँ महत्वपूर्ण जूगुलिं लँया स्तर विकास यायेमाःगु खँ धयादिल। कोषाध्यक्ष बाबुकाजी साँछें टिष्टुङ्गया न्हकं अय्ला नं पर्यटकया नितिं न्हूगु सवाः जुइफइगु खँ कनादिल ।
ज्याझ्वलय् उपाध्यक्ष सुरेन्द्रभक्त श्रेष्ठं ताः इलंनिसे समाजसेव गमाललिसे रिसोर्टय् वयेगु बारे खँ जूसां नं साइत चूमलाच्वंगु खँ कनादिल। थःपिं टिष्टुङ्ग रिसोर्टय् थ्यनेधुंकाः थनया लसकं मोहित याःगु खँ धासें टिष्टुङ्गं उपत्यकां अवलोकन यायेबलय् बांलाःगु लू खनेदुगु धासें टिष्टुङ्गया तारिफ यानादिल।
