अतिरिक्त इलय् लाउतारो मार्टिनेजं गोल यायेवं अर्जेन्टिनां कोलम्बियायात बुकाः १६ क्वःतक कोपा अमेरिका फुटबल उपाधि त्याकूगु रिकर्ड तःगु दु।

अमेरिकाया फ्लोरिडाय् च्वंगु हार्ड रक स्टेडियमय् थौ सुथय् जूगु ४८ क्वःगु संस्करणया कोपा फाइनलय् अर्जेन्टिनां कोलम्बियायात १–० गोलं बुकूगु खः। अर्जेन्टिनाया निंतिं कासाया ११२ गु मिनेटय् जियोभानी लो सोल्सोया पासय् लाउतारो मार्टिन्जेलं निर्णायक गोल याःगु खः। कासाया ९७ गु मिनेटय् लाउतारो व लो सोल्सो निम्हं मैदानय् दुहां वःगु खः।

निगुलिं टिमं निर्धारित ९० मिनेटय् गोल याये मफुगुलिं कासा अतिरिक्त ईलय् वःगु खः। अर्जेन्टिनाया कप्तान व सुपरस्टार लियोनल मेस्सी घाःपाः जुया निगूगु हाफय् हे मैदान त्वःताः वंगु खः। कासाया ६६ गु मिनेटय् वयागु थासय् निकोलस गोन्जालेज म्हितूगु खः।

च्याम्पियन जुइधुंकाः अर्जेन्टिना कोपा अमेरिकाय् दकले सफल टिम जूगु दु। थ्वसिबें न्ह्यः अर्जेन्टिना व उरुग्वें झिंप्यक्वःतक उपाधि त्याकूगु खः। आः अर्जेन्टिनां उरुग्वेयात लिउने लाकूगु दु। अथे हे अर्जेन्टिनां नं लगातार स्वंगू मू उपाधि त्याकूगु दु।

अर्जेन्टिनां सन् २०२१ य् कोपा अमेरिका व सन् २०२२ य् फिफा विश्वकप उपाधि त्याकूगु खः।

Categorized in कासा