स्पेनिया ल्याय्म्हम्ह स्टार लमिन यमलं युरो २०२४ या उत्कृष्ट युवा कासामि अवार्ड त्याकूगु दु। स्पेनयात प्यक्वःगुखुसि युरो उपाधि त्याकेगु निति १७ दँया युवा स्टारं न्हापांगुखुसि युरो म्हितेगु झ्वलय् उत्कृष्ट युवा कासामिया सिरपाः त्याकूगु खः।

युरो २०२४ य् छगू गोल याःगु खःसा प्यंगू असिस्ट नं याःगु खः । युरोया थुगु संस्करणय् दकलय् अप्वः ग्वाहालि याःम्ह कासामि नं जूगु खः। कासा न्यंक वं मुक्कं ५०७ मिनेट म्हितूगुलि दकलय् अप्वः ३२ ड्रिबल याःगु खः।

सेमिफाइनलय् फ्रान्सविरुद्ध यमलं तःधंगु गोल याःगु खः। छगू गोलं ल्यूने लाःगु इलय् वं स्पेनया नितिं बराबरी गोल याःगु खः। न्ह्यय्गू कासाय् म्हितूगु खः ।समूह चरणय् क्रोएसियायात ३–० गोलं बुकूगु कासाय् डेब्यु यानाः युरोया दकलय् ल्याय्म्ह कासामिया कीर्तिमान तःगु खः।उगु इलय् १६ दँ ३३८ न्हु जक दुगु खः।

सेमिफाइनलय् फ्रान्स विरुद्ध गोल यानाः युरोया इतिहासय् दकलय् ल्याय्म्हम्ह कासामि नं जूगु दु। फ्रान्स विरुद्ध गोल याःगु इलय् १६ दँ जक दुगु खः। फाइनलय् इंग्ल्यान्डयात २–१ गोलं बुकेगु छन्हु न्ह्यः हे १७ दँ क्यंगु खः।

आःतकया युरोया दकलय् बांलाःम्ह ल्याय्म्ह कासामि जूपि थुकथं दु

२०१६ : रेनाटो सान्चेज (पोर्चुगल)

२०२० : पेड्रि (स्पेन)

Categorized in कासा