स्पेनं युरोपेली कप प्यक्वः तक त्याका कीर्तिमान तःगु दु। जर्मनीया बर्लिनय् जूगु फाइनलय् इंग्ल्यान्डयात २–१ गोलं बुकाः स्पेनं प्यक्वः तक युरो कप त्याका कीर्तिमान तःगु खः।

स्पेनया लागि निको विलियम्स व माइकल ओयाजाबालं गोल याःगु खःसा इंग्ल्यान्डया लागि कोल पाल्मरं छगू गोल याःगु खः। न्हापांगु हाफय् छगू हे गोल मजूगु खःसा निगूगु हाफय् स्वंगू गोल जूगु खः।

कासाया ४७ गु मिनेटय् निको विलियम्सं छगू गोल यासें स्पेनयात न्ह्यने यकूगु खःसा ७३ गु मिनेटय् कोल पाल्मरं इंग्ल्यान्डया निंतिं बराबरी गोल याःगु खः। अथेहे ८६ गु मिनेटय् ओयाबाजलं गोल यानाः स्पेनयात २–१ गोलं न्ह्यःने लाकूगु खः। उगु गोलं हे स्पेनं प्यक्वःगु पटक युरोपेली च्याम्पियन जूगु खः।

स्पेनं सन् १९६४ या निगूगु संस्करणय् न्हापांखुसी उपाधि त्याकूगु खःसा सन् २००८ व २०१२ य् लगातार युरो त्याकूगु खः। स्पेन युरोया दकलय् सफल टिम जूगु दु।

लगातार निक्वःगुखुसि इंग्ल्यान्ड उपविजेता जूगु दु। थ्वसिबें न्ह्यः युरो २०२१ या फाइनलय् थःगु हे घरेलु मैदानय् जूगु पेनाल्टी सुटआउटय् इंग्ल्यान्ड इटालीलिसे बूगु खः।

Categorized in कासा