नवनियुक्त प्रधानमन्त्री केपी शर्मा ओलीं कन्हय् थःलिसें फुक्क मन्त्रीपिन्त शपथ ग्रहण यायेगु तयारी याःगु दु।

प्रधानमन्त्री ओलीं सोमवाः सुथय् ११ ताः इलय् राष्ट्रपति ज्याकुथिइ सपथ ग्रहण याइगु ज्याझ्वः दु। ओलीं शपथ कायेधुंकाः प्रकाशमान सिंह व विष्णुप्रसाद पौडेलयात उपप्रधानमन्त्रीया सपथ ग्रहण याइगु जूगु दु।

पौडेलयात अर्थ मन्त्रालय दइगु पुष्टि जुइधुंकूगु दु।स्रोतया कथं नवनियुक्त प्रधानमन्त्री ओलीं उपमहासचिव पृथ्वीसुब्बा गुरुङ, सचिवपिं योगेश भट्टराई व छबिलाल विश्वकर्मायात मन्त्री दयेकेगु तयारी याःगु दु। सचिवालय बैठकं योग्य व अनुभवी मन्त्री नियुक्त यायेगु मापदण्ड दयेकूगुलिं वरिष्ठ नेतात मध्ये गुरुङ, भट्टराई व विश्वकर्मायात मन्त्री जुइगु धलखय् दुथ्याकूगु खः।

अथे हे मन्त्री जुइपिं नेतातय्गु धलखय् पुलांपिं मन्त्री जुली महतो व कृष्णगोपाल श्रेष्ठ नं दु । ओली प्रधानमन्त्री जुयाच्वंगु इलय् न्हापाया कार्यकालय् महतो व श्रेष्ठ नं मन्त्री जुइधुकुगु खः। कास्कीया विद्या भट्टराईयात मन्त्री दयेकेगु तयारी यानाच्वंगु दु। सुदुरपश्चिम प्रदेशपाखे दामोदर भण्डारी व तारा लामा मन्त्री जुइगु धलखय् दु।

भण्डारी न्हापा प्रचण्डया सरकारय् मन्त्री जुयादीगु खःसा लामा सुदुरपश्चिम प्रान्तय् मन्त्री जुयादीगु खः। प्रचण्ड नेतृत्वया सरकारय् कानूनमन्त्री जुयादीम्ह पदम गिरी नं हाकनं मन्त्री जुइगु सम्भावना दुगु खँ सूत्रं धाःगु दु।

Categorized in राष्ट्रिय