राष्ट्रिय स्वतन्त्र पार्टीया महामन्त्री पदं बर्खास्त जूम्ह मुकुल ढकालं अध्यक्ष रवि लामिछानेयात छानबिन याये मागु माग याःगु दु।

पार्टीं कारवाही याःगु कन्हय् कुन्ह थौ बुधवाः हे पत्रकार सम्मेलन यासे ढकालं पार्टी अध्यक्ष लामिछानेयात कयाः न्ह्यसः तःगु खः। १९ गतेया बैठकय् म्हुतुइ हाकुगु टेप तयाः च्वनेगु थःगु कमजोरी जुइफुगु खँ वय्कलं कनादिगु दु।

अध्यक्ष लामिछानेयात तसकं असन्तुष्ट जुयाः वय्कलं सहकारी ठगी प्रकरणया छानबिन यायेत माग न यानादीगु खः। वंगु इलय् सर्वोच्च अदालतं लामिछानेयात कयाः छानबिन जुइमाः धकाः धाःगु खः, “थुकियात कयाः रास्वपाया बिचाः छु दु?” पार्टीं छगू स्वतन्त्र छानविन समिति नीस्वनेमाः।

थज्याःगु समितिइ च्वनीपिं मनूत राजदूत ल्ययेगु थेंज्याःगु हे प्रक्रियां च्वनिपि माः धका धयादीगु खः।वय्कलं थम्हं जनताया खँ ल्हायेबलय् कारवाही याःगु व वइगु महिनानिसें प्रस्ताव यात्रा न्ह्याकेगु व जनतायात गुकथं वनेगु धकाः न्यनेगु जुइ धका धयादीगु दु।

Categorized in राष्ट्रिय