नेपाल भाषा व लिपि स्यनिइगुलि न्हापां व्यावसायिक कम्पनी नेवाः(स्यनेकुथि) प्रशिक्षण केन्द्र १७ दँ थ्यःगु दु। नेपालभाषा, प्रचलित लिपि, रञ्जना लिपियात छ्यला थीथी सफू प्रकाशन, दसिपौ तयार यायेगु आज्जु कथं नेपाल भाषा ख्यलय् ल्याम्ह्य तयेत न्ह्यने हयेगुलि रुबिन शाक्यं उगु कम्पनीया परिकल्पनायाना उगु कम्पनी निस्वगु खः। म्हिगः केन्द्रं छगु ज्याझ्वः यासे कम्पनीया १७ क्वःगु स्थापना दिवस हःगु खः।

उगु ज्याझ्वलय् नेपालभाषा व नेपाललिपि प्रशिक्षणय् ब्बति काःपिन्त दसिपौ लल्हायेगु ज्या जुगु दु। स्वला पौ साहित्यिक पत्रिका दबू साहित्य, लिपि सम्बन्धी डिजिटल पत्रिका छगु ज्याझ्वः दथुइ त्रिभुवन विश्वविद्यालय नेपालभाषा केन्द्रीय विभागया प्रमुख डा.राजनलाल जोशीं बिमोचन यानादीगु खः।

मूपाहा विभागया प्रमुख जोशीं विश्वविद्यालय नेपालभाषा ब्बनिइपि अप्पो जुयावंगुलि न्हुगु न्हुगु अवसर वःगु दु धका धयादीगु खः। नेपालभाषा, लिपियात छ्यला थुकियात लजगा कथं कया न्ह्यावने स्वगु तसक बालागु ज्या जुगु धका धयादीगु खः।

ज्याझ्वलय् केन्द्रया कार्यकारी निर्देशक रुबिन शाक्य, लिपिविद् लोकरत्न शाक्य, नेपाल समाचारपत्रया सह सम्पादक सुनील महर्जन, नेवाः पत्रकार राष्ट्रिय दबू यल शाखाया अध्यक्ष मञ्जु बज्राचार्यपिन्स रुबिन शाक्यं नेपाल भाषा व लिपि स्यनिइगुलि न्हापां व्यावसायिक कम्पनी दयेका ज्या याना च्वगुलि सकिसिया प्रशसा यायेमाः धका धयादीगु खः।

Categorized in राष्ट्रिय