येँ महानगरं राजधानीइ सम्पदा क्षेत्रय् ‘भेहिकल फ्री जोन’ दयकेत्यगुलि विरोध जुयाच्वंगु दु। महानगरया कार्यपालिका बैठकय् प्रस्ताव यागु नीति व कार्यक्रमया ३८ गु बुँदाय् विश्व सम्पदासूचीइ सूचीकृत बौद्ध व स्वयम्भु महाचैत्यय् महानगरया मातहतय् सञ्चालन व व्यवस्थापन यायेत माःगु कथं समन्वय व कानुनी प्रबन्ध यायेगु उल्लेख दु। उगु बुँदाय् विश्व सम्पदा धलखय् सूचीकृतबाहेक न्हुगुसतक, नरलय् दुगु हाँडीगां प्राचीन पुरातात्विक व विशेष महत्वय् फ्री भेहिकल जोनया कथं विकास यायेगु धका धयातःगु दु।

महानगरया उगु प्रस्तावयात कया स्थानीयतय्स विरोध याना वयाच्वंगु खः। स्थानीयतय्स थ्व हे यात कया वडा नं. २२ व २३ बिरोध यायेगु सुरु यागु दु। आदिवासी स्थानीयतयेगु नयेगु व त्वनेगु कथं स्वागु विषययात कया हचुवां कया सवारीसाधन चले याये मदइगु धका याःगु निर्णययात स्थानीय व अन च्वपि व्यापारी तय्स विरोध याःगु दु।आःतक थुगु प्रस्ताव पास जुगु मदुनि। मेयर बालेन्द्र साहं थुगु ज्या पेले याना जुसा सम्पदा क्षेत्रय् भेहिकल फ्री जोन दयेकगु योजना दयका तःगु दु। प्राचीन सम्पदा शहर व प्राचीन व्यापारिक यायेगु थाय् गज्यागु जुइ ? पूर्वाधार मदयक म्हो जुया वयाच्वंगु ग्राहक व पर्यटकत कन्ह्य हाकन न उगु थासय् हयेगु योजना छु दु ? थज्यागु विषय ध्यान मतसे थःगु एकलौटी निर्णय यायेत स्वंगु येँ महानगरया तधःगु कमजोरी जुइफु।

खय्तला मेयर साह न यागु थुगु प्रस्तावय् एमाले, नेपाली कांग्रेस व एकीकृत समाजवादीया वडा अध्यक्षं संशोधन यायेगु माग याये धुकुगु दु। अभियन्ता नाप स्थानीय तयेगु ल्वापू याका वडा अध्यक्षतयेत ब्बथलेगु मेयर साहं यागु थीथी कुत जुयाच्वंगु खः। स्थानीयपिनिगु सहमति मदयक थज्यागु ज्या लिपातक बालाइ मखु। विनाआधार प्राचीन व्यवसाय न्ह्यकेगु कथं जुइगु निर्णय मान्य जुइ मखु धका स्थानीय तयेगु धापू दु। फ्री भेहिकल जोन दयकेत अन यागु व्यवसाय गये जुइ ? थज्यागु खँय् विश्लेषण मयासे याइगु निर्णय मान्य जुइ फइ मखु।

थ्व हे योजना कथं महानगरं न्हुसतकय् सवारी निषेधित क्षेत्र दयकेगु लागि पार्किङ चिइकूगु खः। पार्किङ चिइकेवं फुटपाथ दयकेगु योजना हःगु खः। सडक विभाग व वडा कार्यालयं विरोध याये धुका फुटपाथ विस्तार यायेगु दिकूगु दु । हाकन फ्री भेहिकल जोनया नामय् न्हुसतकय् च्वपिन्त बिस्थापित यायेत स्वंगु धका स्थानीयतयस धया वयाच्वंगु खः। छु न योजना दयके न्ह्यः अन यागु गुरुयोजना दयकेमाः।

अन च्वपि स्थानीय जनप्रतिनिधि व सरोकारवालापि नाप सहलह ब्याकेमाः वया लिपा जक निर्णय यासा तसक बालाइ। अन न्हापानिसे याना वयाच्वंगु व्यवसाय व प्राचीन इतिहास न्हंकेगु कथ ज्या जुइगु भेहिकल फ्री जोन दयके मज्यु। थुगु विषयखय् महानगरं ध्यान बिइमाः।