‘आदिवासी जनजाति संकिपाया लागिं कथावस्तु छनौट’ विषयक कार्यशाला गोष्ठी यलय् न्ह्याःगु दु। नेवाः फिल्म सोसाइटीया ग्वसालय् प्यन्हुयंकया कार्यशाला गोष्ठी आइतबाः (असार ९) निसें यलया नुगलय् न्ह्याःगु खः।

आइतबाः छग ज्याझ्वःया दथुइ आदिवासी जनजाति चलचित्र महासंघया नायः पुर्खाजित राईं गोष्ठीया उलेज्या यानादिल। ज्याझ्वलय् न्ववासें महासंघया नायः राईं नेपालया मातृभाषी संकिपाया सुरुवात नेवाः संकिपा ‘सिलु’ पाखें जूगु लुमंकुसें आदिवासी जनजाति संकिपाया उत्थानया लागिं नेवाः समुदायया हे भूमिका महत्त्वपूर्ण जुइगुलिइ बः बियादिल।

‘नेवार समुदाय मदंक ह्यूपाः वइमखु धकाः गुथी विधेयकविरुद्धया आन्दोलनं नं प्रमाणित यायेधुंकल। आः मातृभाषी संकिपाया ख्यःया उत्थानया लागिं नं नेवाः समुदाय हे दनेमाः। नेवाः समुदाय मदंक झीगु विकास जुइमखु’ नायः राईं धयादिल। अथेहे, वरिष्ठ सिने पत्रकार विजयरत्न असंबरें मातृभाषी संकिपाकःमितयसं नाफा वा छुं नं कथं आर्थिक लबःया आशा मयाःसे समुदाय व मातृभाषाया उत्थानया हे लागिं थ्व ख्यलय् न्ह्यज्यानाच्वंगु धयादिल। ‘मातृभाषी संकिपाकःमितयसं संकिपा दयेकाः धेबा कमे यायेगु, छेँ दयेकेगु आशा याःगु मदु।

मांभाय् व समुदायया पहिचान स्थापित यायेत जानाच्वंपिं मातृभाषी संकिपाकःमितयत राज्यं संरक्षण यायेमाः’ असंबरेया धापू खः। नेवाः फिल्म सोसाइटीया नायः बिराजकाजी राजोपाध्यायं सकिपायात कथावस्तुं हे आदिवासी जनजाति संकिपा दयेकीगुलिइ बः ब्युसें भाषा, वसः व लोकेसनय् जक ध्यान बियां मगाइगु धयादिल।

अथेहे, फिल्म सोसाइटीया निवर्तमान नायः लुःजः सिंहं विचार विमर्श, सहलहं हे न्हूगु बिचाः पिथनाः नेवाः संकिपा ख्यःया उत्थानया लागिं नेवाः फिल्म सोसाइटी जानाच्वंगु धयादिल। असार ९ गते आइतबाःनिसें न्ह्याःगु कार्यशाला गोष्ठी वइगु असार १२ गते बुधबाः क्वचाइ।

कार्यशाला गोष्ठीया न्हापांगु दिनय् पेजथ्री बाःछिपौया सम्पादकलिसें सर्ट फिल्म निर्देशक व स्क्रीप्ट च्वमि दर्शनबीर शाक्यं आदिवासी जनजाति विषयवस्तुइ स्क्रीप्ट च्वयेबलय् बिचाः यायेमाःगु पक्षयाबारे खँ तयादीगु खः।

किपा बिक्रम खड्गी

Categorized in मनोरन्जन