यल महानगरपालिका १६ वडाया व्यवस्थापनय् आः याकन हे चान्हय् नं थःत यःगु व थयात माःगु सामान न्यायेमिइ दइ कथं रात्रीकालिन बजाः चायेकेगु ग्वसाः जुया च्वंगु खँ यल महानगरपालिका वडा नं १६ या वडाध्यक्ष निर्मलरत्न शाक्यं कनादीगु दु।

यलया वडां नं १६ या ग्वसालय् मिस्तयेत आत्म निर्भर व स्वरोजगार या आज्जु ज्वना गर्जियस फेशन टेक्नोलोजि इन्स्टिच्युट (गिफ्ट) पाखें ख्वीन्हु यंक्कया बुटिक कोर्ष ट्रेनिङया समापन ज्याझ्वलय् अथे धयादीगु खः। गिफ्टया प्रशिक्षक कलाकार शोभा महर्जनं उगु ज्याझ्वलय् यल वडा १६ या नीम्ह मिस्तयसं ब्वति कयादीगु खः।

समापन ज्याझ्वलय् प्रशिक्षार्थी पाखें विणा शाक्य, सुनयना शाक्य व त्रिशला राजभण्डारी पिन्सं प्रशिक्षण ज्याझ्वः पाखें थःम्हेसिनं सयेकागु व यानागु अनुभव न्यंकादिसे थज्यागु तालिम पाखें शिप विकास जूगु जक मखसे आत्मविश्वास नं बढे जूगु खँ कनादिगु खः। ज्याझ्वलय् विशेष पाहाँ कथं बरिष्ठ सिनेपत्रकार विजयरत्न असंबरें यलय् वडा १६ लगायत मेमेगु वडापाखें जुया च्वंगु भौतिक विकासया नापनापं सामाजिक, सांस्कृतिक विकास या ज्या न्ह्या रोजगार मुलक ज्याय् तिबः बिया च्वंगु खँ या तारीफ यासे मेमेगु थायया वडापाखें नं थजागु ज्या न्ह्याके माःगु खँय् बः बियादिल।

अथेहेतुं बुटिक एशोसियसनया संस्थापक अध्यक्ष उज्ज्वल कृष्ण श्रेष्ठं बुटिक फेशनया शिप धइगु जीवनय् सदां ज्या वइगु शिप खः धका धयादिल। वडा १६ या वडा सदस्य मिसा उप समितिया कजि बबिता श्रेष्ठया सभाध्यक्षताय् न्ह्याःगु उगु समापन ज्याझ्वलय् वयकलं मिस्त धइपिं आः न्हापा थें छेँज्याय् जक लिकुना च्वनिपिं मखये धुंकल धका धासे सामाजिक व पारिवारिक समृद्दिया ज्याय् धिसिलागु पलाः ल्ह्वनिपिं जुइ धुंकल धयादिल।

Categorized in राष्ट्रिय