राजोपाध्याय समाजय् हाकनं छक्वः संजय शर्मा राजोपाध्यायं नेतृत्व याःगु दु। वंगु शनिबाः ख्वपय् जूगु समाजया प्यक्वःगु तःमुंज्यां नृत्य कलाकारलिसें नृत्य निर्देशक राजोपाध्याययात निक्वःगु खुसी नायः ल्यःगु खः।

अथेहे अधिवेशनं निर्विरोध निर्वाचित याःगु १३ दुजःया कार्य समितिया निम्ह न्वकुलिइ रचना शर्मा राजोपाध्याय व संचारकर्मी बिराजकाजी राजोपाध्याय दु। म्यू छ्यान्जेया भाला बन्दना शर्मा राजोपाध्यायं चूलाकूगु दुसा छ्यान्जे पदय् बिजय शर्मा राजोपाध्याय चयन जुल। दां भरिं व ल्यू दांभरिंया भाला छसिकथं उद्धव आचार्य राजोपाध्याय व चेतनादेवी शर्मा राजोपाध्याययात वंगु दु।

कार्य समितिया खुम्ह दुजलय् बिरु सुवेदी राजोपाध्याय, किशोर शर्मा राजोपाध्याय, महेशबाबु शर्मा राजोपाध्याय, त्रिलोचन राजोपाध्याय, श्रीमणिराज शर्मा राजोपाध्याय र गिरिश शर्मा राजोपाध्याय दु। निम्ह दुजः कार्य समितिं मनोनित याइगु समाजं न्ह्यथंगु दु।

अधिवेशनया उद्घाटन सत्रय् प्रा.डा. पुरुषोत्तम लोचन श्रेष्ठ, नेपाल प्रज्ञा प्रतिष्ठानया प्राज्ञ अगिब बनेपाली, यल नेवाः समाजया नायः विनोद ताम्रकार, ज्योतिषाचार्य बीरेन्द्र प्रसाद कायस्थं नेवाः समाजया सनातन धर्म संस्कृति परम्पराया संरक्षण यायेत राजोपाध्याय समाजया भूमिका महत्वपूर्ण जुइगु खँय् बः ब्यूसें थःथःगु नुगः खँ तयादीगु खः। राजोपाध्याय समाजया निवर्तमान नायः अमरराज शर्मा राजोपाध्याय व संस्थापक नायः बदन ज्वालानन्द राजोपाध्यायं समाजया उत्थान यायेत सकलें संगठित जुइ आवश्यक दुगु धासें सकल राजोपाध्यायतय्त संस्थाय् आवद्ध जुयाः नापनापं न्ह्याःवनेत इनाप यानादिल।

उगु हे ज्याझ्वलय् वंगु २०७८ श्रावणनिसें २०७९ असारतक येँ, यल, ख्वपय् स्वथासं जूगु ज्याम्ह द्यःब्रह्मूतय्पाखें पञ्चाभिषेक रुद्री पाठ ज्याझ्वः, २०७९ श्रावणय् जूगु अयुताहुती यज्ञ ज्याझ्वलय् ग्वाहालि याःपिं ग्वाहालिमि, २०७८ व २०७९ सालया एस.ई.ई. परीक्षा ताःलाःपिं राजोपाध्याय विद्यार्थीतय्त सम्मान याःगु खःसा समाजं ग्वसाः ग्वःगु म्ये कासा ‘गायन प्रतिभाको खोजी’ या त्याकामितय्त सिरपाः नं लःल्हाःगु खः।

अथेहे, समाजया येँ जिल्ला समन्वय समितिं न्ह्याकूगु संस्कृत कक्षाया प्रशिक्षार्थीतय्त दसिपौ नं लःल्हाःगु खः। ज्याझ्वलय् समाजं प्रकाशन याःगुलिसें थीथी सफूया ब्वज्यालिसें मीगु ज्या नं जूगु खः।

Categorized in राष्ट्रिय