सरकारं ज्येष्ठ नागरिकतय्त छेँय् हे स्वास्थ्य सेवा व वासः यायेगु व्यवस्था यायेगु घोषणा याःगु दु। राष्ट्रपति रामचन्द्र पौडेलं मंगलवाः संघीय संसदय् मंकाः बैठकय् सरकारं वइगु आर्थिक दँ २०८१÷८२ या नीति नाप कार्यक्रम प्रस्तुत यासे उगु नीति हयेगु जानकारी बिःगु दु।

ज्येष्ठ नागरिकतय्त स्वास्थ्य सेवा कायेगु निति थाकुगु अवस्थायात बिचाःयासे सरकारं थज्यागु नीति हइगु धका धाःगु दु। अथेहे शहीद दशरथ चन्द स्वास्थ्य विज्ञान विश्वविद्यालयय् ३०० शय्याया मेडिकल कलेज व प्राविधिक ज्याझ्वः वइगु आर्थिक दँनिसे सञ्चालन यायेगु सरकारं योजना दयकूगु दु। अथेहे उदयपुर, मोरङ, पर्सा, चितवनलगायत थासय् मेडिकल कलेज स्थापना नाप सञ्चालनया लागि माःगु तयारी यायेगु धका राष्ट्रपति पौडेलं धाःगु दु।

पोखरा स्वास्थ्य विज्ञान प्रतिष्ठानय् वइगु आर्थिक दँनिसे एमबीबीएस लगायतया चिकित्सा शास्त्रया स्नातक तहया अध्ययनस तक न्ह्याकेगु व पूर्वाञ्चल विश्वविद्यालय अन्तर्गत न अस्पताल सञ्चालन यायेगु तयारी दुगु योजनाय् दुथ्याका तःगु दु।

Categorized in राष्ट्रिय