वरिष्ठ पत्रकार सुरेश किरण मानन्धरयात भाषा आयोगया दुजः पदय् मनोनित याःगु दु।

मन्त्रिपरिषदं म्हिगः च्वंगु मुँज्यां संस्कृति मन्त्रालयपाखे याःगु सिफारिस कथं वयकःयात मनोनित याःगु खः। बागमती प्रदेशय् भाषा ऐन लागू जुइ धुंकाः तामाङ व नेपालभाषायात सरकारी कामकाजी भाषा यायेधुंकाः भाषा आयोगया रिक्त पदय् नेवाःयात हे दुजः दयेकेमाःगु माग नेवाः समुदायं यानाच्वंगु खः।

नेवाः समुदायया थ्व हे सम्बोधनयात यासें प्रधानमन्त्री पुष्पकमल दाहाल प्रचण्डं उगु पदय् नेवाःयात हे तयेमाःगु निर्देशन नं बियादीगु खः। भाषा ऐन लागू जूगु लसता सभाय् मूपाहांया थासं प्रधानमन्त्री प्रचण्डं भाषा आयोगया खालि पदय् नेवाःयात हे तयेकेगु उजं बियादीगु खः।

Categorized in राष्ट्रिय