मां व जि
नां रेखा शाक्य (राजमति) | चौलागा आमै ११४४, बैसाख २६ बुधवाः
तुइसे चकंगु ख्वाः च्वामुगु न्हय्
हिराया टप व पुनाचा न्हय्पनय्
जीवनया अनुभव प्वःचिनाः गुजिकाःगु न्यताः
७९ दँया म्वानासु ज्वनाः न्ह्याकाच्वंगु व पलाः
न्ह्याबलें न्हिउ ख्वाः ह्याउँगु सिन्ह झः झः धाः
प्यम्ह मस्तय् इहिपा क्वचायेकाः अजि, तापाअजि जुम्ह
जि छम्हेसित पासा नाला सदां लिक्क तया तम्ह
खः व जिमि मां जितः सदां माया याइम्ह
सुथय् दनि, वंसिब पुइ, द्यः पुज्याइ
थःत व जितः च्या क्वाक्क न्ह्च्यायेकि
कर्मं मां, म्ह्याय्, व्यवहारय् जिपिं पासा
मांयात जि, जितः मां जीवनया लिधँसा
थुकथं न्ह्यानाच्वन जिमिगु जीवनया घःचाः
भुतुलिइ साक्क भिंक ज्वरे याइ
थःत छकू म्हो काइ, जितः अप्वः तयाबिइ
मांमं मतिना थुकथं चकंक ब्वयाबिइ
मांया लुधंगु ख्वाः स्वस्वं जि धन्य जुयाबिइ
जिं छुं मधाःसां ख्वालं सिइका काइम्ह
छु पीर, दुख जुल मांयात कं धाइम्ह
न्ह्याथाय् वंसां छेँय् च्वनाः च्यूता काइम्ह
नःला, मनःला धकाः फोन यानाः न्यनिम्ह
खः व जिमि मां, नुगः चकंकाः माया याइम्ह
तं चाइ मां, वं धाःगु पू मवनेवं
तं चाये जि, थःम्ह धाःथें याये मखनेवं
घौ पलख निम्ह निखे तंचायाः फस्वये
ज्या यायेत ती मां थें हानं निम्हं धस्वाये
ख्याः नी या दथुइ ह्वयाच्वंगु जीवन
न्हियान्हिथं बसन्तया जुइ हानं आगमन
मांया मतिना मथुपिं मस्त धिक्कार
मचा जुयाया अर्थ यायेमते बेकार
द्यः धुंकाःया च्वये मां बौया सत्कार
म्वातले यायेमाः झीसं सदां आदर
