मिडिया काउन्सिल विधेयक हयेगु तयारी
लहनान्युज | चौलागा दशमी ११४४, बैसाख २१ शुक्रवाः
सरकारं मिडिया काउन्सिल विधेयक राष्ट्रिय सभाय् दर्ता याःगु दु। थ्व स्वया न्ह्यः वंगु २०७५ सालय् न राष्ट्रिय सभाय् उगु विधेयक न्ह्याकेगु निति प्रतिनिधि सभाय् सहलह जुयाच्वंगु इलय् हे कार्यकाल क्वचाःगुलि निष्क्रिय जुगु खः।
सरकारं हयेत्यःगु उगु न्हुगु विधेयकय् पत्रकारतय्स आः मिडिया काउन्सिलपाखे म्हसिका पौ कायेमाःगु व्यवस्था तयातःगु दु। थौ कन्ह्यः धाःसा म्हसिका कायेगु निति सरकारं सूचना विभाग व प्रदेशस्थित सञ्चार रजिष्टारया कार्यालयपाखे म्हसिका पौ बियाच्वंगु खः। विधेयकय् थुगु अधिकार मिडिया काउन्सिलपाखे बिइगु प्रस्ताव यानातःगु दु।
२०७५ सालय् सरकारं हःगु मिडिया काउन्सिल विधेयकय् वःगु इलय् न राष्ट्रिय सभां पत्रकारतय्त लाइसेन्स कायेगु निति जाँच बिइमाःगु प्रावधान तयातःगु खः।सरकारं हयेत्यःगु न्हुगु विधेयकय् धाःसा जाँच बिइमाःगु प्रावधान तयातःगु मदु।अय्न पत्रकार तयस प्रेस प्रतिनिधि म्हसिका पौ काय् माल धाःसा सञ्चार संस्थाया सिफारिस कथं योग्यताया दसिपौया प्रतिलिपि दुथ्याकेमाः धका धयातःगु दु । अथेहे पत्रकार तयेगु योग्यता क्वछिउगु अधिकार काउन्सिलयात बियातःगु दु ।
’प्रेस प्रतिनिधि व स्वतन्त्र पत्रकार सम्बन्धी मेमेगु व्यवस्था क्वछिउगु कथं जुइ’ धका धयातःगु दु । विधेयकं काउन्सिलयात निर्णय यायेगु अधिकार बियातःगु खनेदु ।अथेहे, विधेयकं सञ्चार माध्यम तय्स न काउन्सिलं जारी याःगु आचारसंहिता नाप मल्वाइगु कथं आचारसंहिता व सम्पादकीय नीतिया घोषणा यायेमाःगु व्यवस्था दु । सञ्चार माध्यम याःगु स्वनियमन व स्वमूल्याङ्कनया लागि ब्वमि व, स्रोता व दर्शक तयेगु खँ न्यनिइगु कथं स्वनियमन संयन्त्र यायेमाःगु व्यवस्था यानातःगु दु । अथेहे, सञ्चार माध्यमया नायः व सञ्चालक तय्स थःगु लगानी जुगु व्यवसाय, लगानीया ख्यः व स्रोतया बारेय् काउन्सिलयात जानकारी बिइमाःगु व्यवस्था यानातःगु दु।
अज्यागु व्यवसाय वा लगानी यानतःगु संस्थानाप स्वागु सम्बन्धित बुखँ, च्वसू, रचना प्रकाशन व प्रसारण यायेगु इलय् अज्यागु सामग्री याःगु थःगु लगानी दुगु ख्यः व सम्बन्धित जूसा सर्वसाधारण तयेस स्वयेगु, ब्वनिइगु व न्यने फइगु कथं जानकारी यायेमाःगु प्रावधान विधेयकय् तयातःगु दु।
सरकारं छु न सञ्चार माध्यमं आचारसंहिता उल्लंघन यात धाःसा अनलाइनपाखे उजुरी कायेफइगु प्रावधान विधेयकय् तयातगु दु सा उकिइ वंगु उजुरीइ काउन्सिलं जाँचबुझ यायेफइगु प्राभधान यानातःगु दु। विधेयकं पत्रकार लिसे सञ्चार माध्यमं काउन्सिलपाखे जारी जूगु आचारसंहिता अःखः छु न ज्या यात धाःसा व मनू तयेगु मर्यादा नाप प्रतिष्ठाय् गम्भीर लिच्वः लाइगु कथं ज्या जुल धास उकिया क्षतिपूर्तिया दाबीनापं सम्बन्धित सञ्चार संस्था व पत्रकारविरूद्ध जिल्ला अदालतय् उजुरी बिइ फइगुे प्रावधान तयातःगु दु।
विधेयकं मिडिया काउन्सिलया नायः जुइम्हेसिगु योग्यता सर्वोच्च अदालतया न्यायाधीश सरह जुइमाःगु प्रावधान दु । अथेतु, काउन्सिलया नायः न सर्वोच्चया प्रधानन्यायाधीश नाप शपथ कायेमाःगु प्रावधानय् दु। २०७५ सालय् हःगु विधेयकय् स्नातक उपाधी हासिल याना म्हति न झीदँ तक पत्रकारिता ख्यलय् ज्या याःगु अनुभव दुम्ह मनूयात जक नायः जुइफइगु प्रावधान दयका तःगु खः । २०७५ या विधेयकय् नायः जुइम्हेसित नियुक्ति यायेगु लागि सिफारिस यायेत मन्त्रालयया सचिवया संयोजकत्वय् समिति तयेगु प्रस्ताव तयातःगु खः।
आः थुगु पटकया विधेयकय् न सचिवया संयोजकत्वय् सरकारं क्वछिनातम्ह विज्ञयात दुजः व मन्त्रालयया सहसचिव याना स्वम्हेसिगु सिफारिस समिति जुइगु प्रस्ताव यानातःगु दु।थज्यागु, समितिं सरकारयात काउन्सिलया दुजः कथं ब्बति, दर्शक व स्रोतयापाखे प्रतिनिधित्व याइम्ह मनूयात नियुक्तिनिसे प्रदेशतक छम्ह काउन्सिलया सदस्यय् सिफारिस यायेगु अधिकार बियातःगु दु।
