वागमति प्रदेशया संस्कृति पर्यटन तथा सहकारी मन्त्री शैलेन्द्र बज्राचार्यं प्राथमिकताया आधारय् आः युद्धस्तरं कार्यक्षेत्रय् न्ह्याःवनेगु धयादीगु दु।

बागमति प्रदेशया मुख्यमन्त्री शालिकराम जम्कट्टेलं विश्वासया मत काःगुलिसें मन्त्री बज्राचार्यं थथे धयादीगु खः। ‘यायेमाःगु ज्या यक्व दु। दक्वं ज्या व योजनायात प्राथमिकताया लिधंसाय् न्ह्याकायंकाः सकसिनं अनुभव याइकथं हे लिच्वः बी’ मन्त्री बज्राचार्यं प्रतिवद्धता प्वंकादिल।

दकले न्हापां भाषा विधेयकयात कार्यान्वयनय् यंकेत थम्हं भूमिका म्हितेगु बज्राचार्यं धयादिल। वंगु असोज २२ गते बागमति प्रदेश सभाया वैठकं प्रदेशय् सरकारी कामकाजया भाषा सम्वन्धय् व्यवस्था यायेत दयेकूगु विधेयक सर्वसम्मतं पारित याःगु खः। गुगु विधेयकं बागमति प्रदेशया सरकारी ज्याखँय् नेपालभाषा व तामाङ भाषा नं छ्यलेत लँ चाःगु दु।

‘भाषा विधेयक पारित जुइधुंकूगु अवस्थाय् आः थुकियात कार्यान्वयनय् यंकेगु भाला जिगु ब्वहलय् वःगु दु। प्रभावकारी रुपं भाषा विधेयक कार्यान्वयनय् यंकेत जिं भूमिका म्हिते’ मन्त्री बज्राचार्यं थःगु न्यंकुसें धयादिल।आः आम नागरिकं सहकारी सम्वन्धय् तःधंगु हे समस्या फयाच्वंगु अवस्थाय् सकसिनं अनुभव याइगु कथं थुगु समस्या ज्यंकेगु प्रतिवद्धता नं बज्राचार्यं प्वंकादिल।

थनया जात्रापर्व, मूर्त अमूर्त संस्कृतिया संरक्षण, सम्वद्र्धन व प्रवद्र्धनय् आः बागमति प्रदेश सरकारया अहम् भूमिकालिसेंया सशक्त उपस्थिती दइगु बज्राचार्यं धयादिल। ‘झीगु म्हसीका धयागु हे स्थानीय संस्कृति जात्रापर्व खः व थुकिया संरक्षणया दायित्व प्रदेश सरकारया नं खः। आः स्थानीय जात्रापर्व, संस्कृतिया संरक्षण प्रवद्र्धनय् बागमति प्रदेश सरकारया प्रत्यक्ष व सशक्त उपस्थिती दइ’ बज्राचार्यं छसिकथं थःगु योजनात न्यंकायंकल।

देय्या अर्थतन्त्र बल्लाकेगु छगू मू आधार पर्यटन जुयाच्वंबलय् थ्व क्षेत्रय् ठोस योजना हयाः न्ह्याःवनेगु वय्कलं धयादिल। थनया १३ जिल्लाया पर्यटकिय गन्तव्य म्हसीकाः उकिया प्रवद्र्धन यासें पर्यटक दुकायेत ठोस योजना हयेगु वय्कलं धयादिल। थःत बधाई व भिंतुना ब्यूपिं सकसित सुभाय् देछासें मन्त्री बज्राचार्यं आः हे बधाई नयेगु ई मवःनिगु व नतिजा बियाः हे जक बधाई नयेगु धयादीगु दु।

Categorized in राष्ट्रिय