निर्वाचन आयोगं अध्यक्षय् रेशम चौधरी मानेयायेत अस्वीकार
लहनान्युज | सिल्लागा द्धादशी ११४४, फागुन २४ बिहीवाः
![](https://www.lahananews.com/sites/default/files/resm.jpg)
निर्वाचन आयोगं नागरिक उन्मुक्ति पार्टी (नाउपा) या अध्यक्षय् रेशमलाल चौधरीया नामय् अद्यावधिक यायेत अस्वीकार याःगु दु।
नागरिक उन्मुक्ति पार्टी न पुस २७ गते कैलालीया टीकापुरय् जूगु महाधिवेशनपाखे चौधरीयात सर्वसम्मत कथं अध्यक्ष ल्यःगु खः। व हे कथं नाउपां दलया अभिलेख अद्यावधिक यायेत निर्वाचन आयोगय् माघ २९ गते निवेदन बिःगु खः।
उगु निवेदनय् निर्वाचन आयोगं बिहीवाः निर्णय यासे रेशमयात नाउपाया अध्यक्ष मानेयायेत अस्वीकार याःगु दु। आयोगया प्रवक्ता शालिग्राम शर्मा पौडेलया कथं राजनीतिक दलसम्बन्धी ऐनया व्यवस्था कथं नाउपाया निर्वाचन आयोगय् थ्व स्वया न्ह्यः जुयाच्वंगु अभिलेख अद्यावधिक यायेफइ मखु धका निर्णय याःगु दु।
निर्वाचन आयोगय् दुगु अभिलेखय् नाउपाया अध्यक्षय् रञ्जिता श्रेष्ठ चौधरी जुयाच्वंगु दु।
Categorized in राष्ट्रिय