कांग्रेसं रवि लामिछानेयात प्रधानमन्त्रीया प्रस्तावयागु मदु
लहनान्युज | सिल्लागा दशमी ११४४, फागुन २२ मंगलवाः
![](https://www.lahananews.com/sites/default/files/ravi_1.jpg)
नेपाली कांग्रेसं राष्ट्रिय स्वतन्त्र पार्टी (रास्वपा) या सभापति रवि लामिछानेयात प्रधानमन्त्रीया प्रस्ताव मयानागु दु धका धाःगु दु।
बूढानिलकण्ठस्थित सभापति शेरबहादुर देउवाया निवासय् सोमवाः बहनि क्वचाःगु केन्द्रीय कार्यसम्पादन समिति बैठक लिपा खँ ल्हाय्गु झ्वलय् पार्टीया नेतातय्सं लामिछानेयात प्रधानमन्त्री प्रस्ताव मयानागु धका धाःगु खः। छु सञ्चार माध्यमपाखे रास्वपा सभापति लामिछानेयात कांग्रेसं प्रधानमन्त्रीया अफर वःगु बुखँ पिहावःगु खः।
रास्वपां गृह मन्त्रालयनापं प्यंगू मन्त्रालयया दाबी याना वयाच्वंगु खः। गृहय् माओवादी केन्द्रं न दाबी त्वःतुगु मदुनि। माओवादीया वरिष्ठ उपाध्यक्ष नारायणकाजी श्रेष्ठ न गृहमन्त्रीया लागि आकांक्षी दु। गृहमन्त्री वल धाःसा रास्वपा सभापति लामिछाने थःहे सरकारय् ब्बति काइगु सम्भावना दु।
‘गठबन्धन बैठकय् गृह मन्त्रालय सू ना कायेगु धइगु सहमति जुइफुगु मदुनि। उकिइ रास्वपा न कांग्रेसं प्रधानमन्त्रीया अफर याःगु प्रचार याना च्वंगु खः, कांग्रेसं लामिछानेयात प्रधानमन्त्री प्रस्ताव यानागु मदु,’ धका छम्ह पदाधिकारीं धाःगु दु। प्रतिनिधि सभाय् रास्वपाया २१ म्ह सांसदपि दु।
Categorized in राष्ट्रिय