बुधवाः फुटपाथ ब्यवसायी व नगर प्रहरी दथुइ जूगु ल्वापुइ लानाः छम्ह पत्रकार नं बांमलाक घाःपाः जूगु दु। कलंकी जुयाः बाग्लुङ लिहां वनेत्यंम्ह पत्रकार कपिल पौडेलयात लुँहितिइ नगर प्रहरीं ज्वनाः दायेफक्व दाःगु खः।

पौडेलं थः बँपसल्या मखु, पत्रकार खः धकाः कार्ड क्यनं नं नगर प्रहरीं ककु ज्वनाः गाडीइ स्वथंगु खँ धाःगु दु। ल्वापु जूगु भिडियो खिचे यानाच्वंगु इलय् पौडेलयात नगर प्रहरीं दाःगु खः। नगर प्रहरीं क्यामेरा, मोबाइल व घडी तक जफत याःगु धाःगु दु।

नगर प्रहरीं दायाः घाःपाः याःगुलिं वय्कःयात बहनी हे अस्पताल यंकाः वासः याःगु खः। थ्व घटनाय् लानाः झिंछम्ह मनू घाःपाः जूगु धाःगु दु । घाःपाः जूपिं मध्ये छम्ह नगर प्रहरी नं लाःपाः जूगु दु।

मानव अधिकारवादीत कुन्दन अर्याल, चरण प्रसाईं, निराजन थपलिया, भगवती अधिकारी, विष्णुप्रसाद पोखरेल, जगत देउजा, प्रकाशमणि शर्मा व राजुप्रसाद चापागाईं मंकाः विज्ञप्ति पिकयाः घटनायात कयाः खेद प्वंकूगु खः।

Categorized in राष्ट्रिय