लुम्बिनीइ फागुण २० गतेनिसे त्रिपिटक पाठ
नृपेन्द्रलाल श्रेष्ठ | सिल्लागा पारु ११४४, फागुन १३ आईतवाः
![](https://www.lahananews.com/sites/default/files/lumbini_4.jpg)
भगवान गौतम बुद्धया पवित्र जन्मस्थल लुम्बिनीइ थ्व हे वइगु फागुण २० गते आइतवाः निसे त्रिपिटक पाठ जुइत्यःगु दु।
अखिल नेपाल भिक्षुमहासंघया ग्वसालय् स्वन्हु तक उगु पाठ जुइ धका विश्वशान्ति विहारय् छगु पत्रकार सम्मेलनयाना जानकारी बिउगु खः। स्वक्वःगु लुम्बिनी अन्तर्राष्ट्रिय त्रिपिटक पाठ – २०८० या नां बिया उगु पाठ यायेगु निति नेपाःया भिक्षुनापं भारत, थाईल्याण्ड, म्यानमार (बर्मां) या भिक्षुपिन्स ब्बति काइगु जुइ धका महासंघया सचिव भिक्षु निग्रोध जानकारी बियादीगु खः।
बुद्धजन्मभूमी लुम्बिनी विश्व शान्तिया मुहान कथं म्हसिकेगु, लुम्बिनीया धार्मिक वातावरण अक्षुण्ण तयेगु नापं सकसिगु मैत्री, करुणा व शान्तिया कामना याना उगु पाठ याये त्यनागु धका सचिव भिक्षु निग्रोधं धयादीगु खः।
त्रिपिटक बुद्धधर्मया मूल प्रमाणिक ग्रन्थ खः। २५ सय दँ न्ह्यः मागधि (पाली भाषा) य् च्वयातःगु उगु ग्रन्थ सुत्र पिटक सैद्धान्तिक, व्यावहारिक जनजीवन सम्बन्धी), विनय पिटक (विनय नियम) व अभिधम्म पिटक (चितसम्बन्धी) याना स्ज.वंगु ब्बय् वर्गीकरण यानातःगु ख ।
भिक्षुमहासंघया ग्वसालय् थ्व स्वया न्ह्यः निकःतक त्रिपिटक पाठ याये धुकुगु दु।
Categorized in राष्ट्रिय