यल महालक्ष्मी नगरपालिकाया वडा नम्बर ६ सिद्धिपुर “थसि” या सानागामय् स्थानीय तय्सं भू खण्डिकरण बिरुद्दया अभियान न्ह्याकूगु दु।

स्थानीयतय्सं शुक्रवाः भूमिपुत्र किसानतय्गु छगु पुचलं  स्थानीय वडा कार्यालयय् जुलुस यासे वडाध्यक्ष धर्म महर्जनयात नापलानां न्हापा कृषि लिसे सांस्कृतिक क्षेत्र व लिपा सांस्कृतिक व आवास क्षेत्र दयकूलि सिद्धिपुरया सुमंगलम फुड्स् प्रा. लि. न माग याःगु बमोजिम जग्गा कित्ताकात यायेमज्यु धका धासे उकियात दिकेत माग याःगु दु ।

उमिसं थःगु वडा क्षेत्रय् स्थानीयतय्त भेदभाव व अन्यायपूर्ण ढंगं क्षति जुइगु कथं न्हुगु संरचनाया लागि जग्गा टुक्रे यायेगु ब्याबसायिक प्लटिङ अस्वीकार याःगु खः। अथेहे वडाध्यक्ष महर्जनं थः व थःगु कार्यालयं स्थानीय जनताया भावना अखः छु न ज्या मयायेगु स्पष्ट यासे सिद्धिपुरया भूमि स्थानीय जनताया हे चाहना कथं छ्यलेगु जुइ धका स्पष्ट यानादीगु खः।

अथेहे स्थानीय कृष्ण कुमार महर्जन व किरण महर्जन लगायतपिन्स सिद्धिपुरयात थःगु हे मौलिकता कथं विकसित यायेमाःगुलि बः बियादीसे स्थानीय तह न जनताया चाहना अखः सुयात थः यः यः थे याकेबिइमज्युगु माग यानादीगु खः।

Categorized in राष्ट्रिय