ज्यापू महागुथि यल जिल्लाया नायःलिसें सांसद् रघुनाथ महर्जनं यलय् जुइगु ज्याझ्वलय ज्यापु महागुथियात सःतेगु मयाःगु विषयस सार्वजनिक रुपय् हे गुनासो यानादीगु दु।

वंगु शनिबाः पाटन संग्रहालय लागाय् ग्वसाः ग्वःगु यल नेवाः समाजया प्रारम्भिक दँमुँज्याय् यल क्षेत्र नं. ३ (क) वाग्मती प्रदेशसभाय् प्रतिनिधित्व यानादीम्ह सांसदं महर्जनं सांसद्या हैसियतय् न्ववाय्गु झ्वलय् थुकथं गुनासो प्वंकादीगु खः ।

यलय् जुइगु ज्याझ्वलय् ज्यापू महागुथि यल जिल्ला समितियात गुबलें नं सःती मखु, छाय् जुइ ? थुकियात निषेध याःगु रुपय् थुइकेगु कि मथुइकेगु ?’ नायः महर्जनं धयादिल, यलया खोकना, सैंबु बुंगमती, धापाखेल, हरिसिद्धि, ठैब, वादेगां, दमाईटार, सुनाकोठी, चपागां, ठेचो, लेले, लुभु, सिद्धिपुर, टिकाथली, लगायत लागायात कार्यक्षेत्रय् ज्यापू महागुथि क्रियाशील जुयाच्वंगु दु। साविकया नगरयात प्यखेरं चाःहिकाः साविकया गां गामय् क्रियाशील जूसां नं यल नगर क्षेत्रय् जुइगु ज्याझ्वलय् झी सुनां नं स्वापू तय्गु, सरोकार तःगु तकं मदु।

छाय् खः थुइके मफुनि ।’ थःगु नुगलय् ब्वलंगु न्ह्यसः प्वंके मखःसां थौं यल नेवाः समाजया न्हापांगु दँमुँज्याय् धाय्गु पाय्छि जुइगु ताय्काः थुगु खँ तयागु नं नायः महर्जनं कनादिल । नेपालभाषा, संस्कृति, स्थानीय विकास व हकअधिकारया निंतिं नेवाः समुदाय छप्पँ जुयाः न्ह्यज्याय् माःगु थुकथंया प्रवृतिं थुगु दिशापाखे न्ह्याः वने मफइगु नं महर्जनया धापु दु।

राज्यं बृहत्तर हितया माग सम्बोधन याकेत जानाः वनेमाःगु खः । तर झी दुने हे अस्वस्थ्य प्रवृतिं कुचा थलाः राज याइपिन्त मलजल याःगु नं वय्कःया तर्क दु। थः सांसद जूगुलिं महर्जनं थौंकन्हय् वरिष्ठ न्वकु शरणगोपाल डंगोलयात ज्यापु महागुथि यलया कार्यवाहकया जिम्मेवारी बियागु नं वय्कलं कनादीगु खः ।

Categorized in राष्ट्रिय