२९ क्वःगु महानगर दिवसया लसताय् राष्ट्रिय सभा गृहमा जूगु ज्याझ्वलय् महानगरपालिका स्तरीय बाँसुरी धेंधेँबल्ला कासाय् वडा नं. २६ या थँवही ल्याय्म्ह पुचः न्हाप जूगु दु।

अथेहे वडा नं. १६ या श्री श्वेत बिनायक बाँसुरी ल्हुति संरक्षण समिति ल्यु व वडा नं. २० या अशोक विनायक व्यवस्थापन समाजया बाँसुरी खलः लियाल्यु लागु दु। न्हापलापिन्त १ लाख ५० हजार रुपैयाँ नगद व शिल्डया कथं वहःया  छपू बाँसुरी, लिउलाम्हेसित १ लाख रुपैयाँ नगद व वहःया छपू बाँसुरी व लियाल्यु लापिन्त ५० हजार रुपैयाँ नगद नाप छपू चिपूगु  बाँसुरी लःल्हागु खः।

उगु कासाय् नेपाल संगीत लिसे नाट्य प्रज्ञा प्रतिष्ठानपाखे जीवन आले, सांस्कृतिक संस्थान (राष्ट्रिय नाच घर) पाखे दूर्गाप्रसाद खतिवडा, रेडियो नेपालपाखे डा. निरञ्जन राजभण्डारीपि निर्णायक मण्डलय् च्वंगु खः। येँ महानगरया उपप्रमुख डंगोलं सिरपा लःल्हानादिगु खः।

उगु कासाय् न्ह्यगू पुचलं ब्बति काःगु खः। सिरपा मत्यापिन्त प्रोत्साहन कथं झीद्धः झीद्धः ध्यवा लःल्हागु खः। प्रोत्साहन कथं येँ वडा नं. १२ पाखे धर्मचक्र तःननी खल, वडा नं. ८ पाखे ग्वलः बाजं खलः, वडा नं. २२ या पाक्वः पुखुद्या मानन्धर सनाः खल, वडा नं. २४ या केशचन्द्र महाविहार संरक्षण समाजपिन्त झीद्धः ध्यवा लःल्हागु खः।

Categorized in राष्ट्रिय