न्हूदँ समारोह समितिपाखें भिंतुना ¥यालि व सभाया सकतां तयारी ज्याझ्वः क्वचाःगु जानकारी नेपाल संवत न्हूदँ राष्ट्रिय समारोह समिति ११४४ पाखें कछलाथ्व पारु कार्तिक २८ गते मंगलवाः येँया बसन्तपुरं न्ह्याइगु भिंतुना ¥यालि व भिंतुना सभाया सकतां तयारी क्वचाःगु जानकारी बिःगु दु।

समारोह समितिया नायः प्रा.डा. नरेशमान बज्राचार्यं बियादीगु जानकारी कथं कछलाथ्व पारु न्हूदँया लसताय् जुइगु ज्याझ्वःया नितिं स्वयं सेवक परिचालनलिसें विशेष पाहाँपिन्त सम्मान यायेगु, ¥यालि व्यवस्थापन यायेगु व मू ज्याझ्वःयात अतिकं व्यवस्थित यायेगु नितिं थीथी कथंया तयारी क्वचाःगु दु ।

नायः बज्राचार्यं न्हूदँया ¥यालि सांस्कृतिक बाजं खलः थ्यं मथ्यं निसः व न्ययेगू दइगु अथेहे, सरकारीस्तरया बाजंतसें नं ब्वति काइगु खँ कनादीगु दु । वय्कलं उगु ¥यालि सुथसिया ७ ता इलय् येँया बसन्तपुरं न्ह्याइगु जानकारी बियादिसें ¥यालिइ दकले न्ह्यःने नायःखिं बाजं, व वयालिपा शंखधरया मूर्ति व वयालिपा ग्वसाः खलःया मू ब्यानर च्वनीगु खँ कनादिसें ¥यालि न्हापालिपाथें बसन्तपुरं न्ह्यानाः क्वःने लागा चाःहिलाः थःनेय्लागाया थीथी थाय् चाःहिलाः बसन्तपुरय् तुं थ्यंकाः ९ ता इलय् भिंतुना सभा जुइगु जानकारी बियादीगु दु ।

वय्कलं उगु सभाय् मूपाहाँ कथं प्रधानमन्त्री पुष्पकमल दाहाल प्रचण्डयात ब्वनातयागु जानकारी बियादिसें विशेष पाहाँकथं बागमती प्रदेशया मुख्यमन्त्री शालिकराम जम्मरकट्टेल व पाहाँ कथं येँ महानगरपालिकाया मेयर बालेन शाह, उपप्रमुख सुनिता डंगोल, अथेहे येँया झिगू क्षेत्रया सांसदपिं, नेवाः आन्दोलनया न्ह्यलुवाःपिंव थीथी ख्यःया विशिष्ट व्यक्तिपिन्त ब्वनातयागु जानकारी बियादीगु दु। न्हूदँ समारोह समितिं दँय् दसंथें थुगुसी नं तःजिक न्हूदँ ११४४ न्यायेकेगु नितिं नेपालभाषाया थीथी खलः पुचः व नेपाल संवत आन्दोलनया न्ह्यलुवाःपिं दुजः जुइगु कथं समारोह समिति नीस्वंगु खः।

नेपाल संवत सिरपाः लःल्हाइगु नेपाल संवत न्हूदँ राष्ट्रिय समारोह समितिं वंगु दँ निसें लःल्हानाः वयाच्वंगु नेपाल संवत सिरपाः थुगुसी नं लःल्हाइगु जूगु दु । समारोह समितिइ च्वंगु सचिवालय मुँज्यां थथे थुगु दँय् नेपाल संवतया आन्दोलनयात च्वन्ह्याकेगु नितिं तःदँ न्ह्यःनिसें ज्वःमदुगु योगदान यानाः वयाच्वंगु राष्ट्रिय विभूति शंखधर साख्वाः प्रतिष्ठानयात लःल्हायेगु निर्णय याःगु दु।

राष्ट्रिय विभूति शंखधर साख्वाः प्रतिष्ठान थिमिइ वंगु झिंगुदँ न्ह्यःनिसें मदिक्क नेपाल संवतया प्रचारप्रसार व नेपाल संवतया प्रवर्तक शंखधर साख्वाःया योगदानयात कयाः थीथी ज्याझ्वः यानाः वयाच्वंगु संस्था खः। अथेहे, मध्यपुर थिमि शंखधरया झ्वाता तयाः दँय् दसं राष्ट्र प्रमुखपाखें स्वांमाः क्वखायेकेगु ज्याझ्वः यानाः वयाच्वंगु खः।

Categorized in राष्ट्रिय