बौद्ध उपासकलिसे नेपालभाषाया साहित्यकार आनन्दसिद्धि तुलाधर मंत। ९० दँ दुम्ह वय्कः वंगु चान्हय् मस्तिष्काघात जुयाः मदुगु खः।

थौं येँया लुतिइ वय्कःया अन्त्येष्टि याइगु जूगु दु। वय्कः युवा बौद्ध समूहया सल्लाहकार नं खः। वय्कलं थःगु अन्त्येष्टि थेरवादी परम्पराकथं यायेगु धकाः छेँजःपिंत धयातःगु जूगुलिं थौं थेरवादी परम्पराकथं वय्कःया अन्त्येष्टि यायेत्यंगु खँ छेँजःपिंसं धाःगु दु।

छुं ई न्ह्यः तिनि तुलाधरया बाखं सफू ‘लिजः’ पिहां वःगु खः। थ्व बाहेक नं वय्कःया आपालं फुटकर च्वसुत पिहां वयाच्वंगु दु। वय्कःया जहान लिसें छम्ह म्ह्याय् व स्वम्ह कायपिं दी।

वय्कःया कायपिं आलोकसिद्धि तुलाधर सम्पदा अभियन्ता खःसा अरुणसिद्धि तुलाधर नेपालभाषा लिसें बुद्ध धर्मया ख्यलय् सक्रिय कार्यकर्ता खः। कान्छाम्ह आभूषणसिद्धि तुलाधर चिकित्सक खः। म्ह्याय् दिव्या ताम्राकार नेपालभाषाया नांजाःम्ह बाखं च्वमि खः।

Categorized in राष्ट्रिय