सिन्धुपाल्चोक जिल्लाया चौतारा साँगाचोकगढी नगरपालिकाय् नेपालभाषायात लागू यायेगु नितिं माःगु कथंया कानुन निर्माण याइगु जूगु दु ।

कार्तिक २४ गते शुक्रवाः नेपाल संवत ११४४ क्यनीगु लसताय् नापं बाग्मती प्रदेशया संसदं भाषा विधेयक पारित याःगु लसताय् चौतारय् जूगु भिंतुना कालालिब ज्याझ्वलय् न्वंवासें मूपाहां नगर प्रमुख कृष्णप्रसाद सापकोटां नेपालभाषायात लागू यायेगु नितिं थःम्हं माःगु कथंया ज्या यायेगु जुइ धकाः बचं बियादीगु खः ।

नेवाः देय् दबू केन्द्रीय समिति, स्वनिगः विशेष प्रदेश समिति व वाग्मती प्रदेश समितिया संयोजनय् जिल्ला समिति, नगर समिति व मिसा दबूया मंकाः ग्वसालय् जूगु उगु ज्याझ्वलय् विशेष पाहां जिल्ला प्रशासन कार्यालयया सहायक प्रमुख निराजन श्रेष्ठं नं भाषा सम्वन्धि विधेयक पारित यायेगु ज्या याःगु धइगु बाग्मती प्रदेस संसदया बांलाःगु ज्या खः धयादिल । ज्याझ्वलय् देय् दबूया केन्द्रीय न्वकू नापं बाग्मती प्रदेशया इन्चार्ज शान्त श्रेष्ठं नेपालभाषा व तामाङ भाषायात कामकाजि भाषाया रुपय् लागू यायेगु ज्या जूगु तसकं लसताया खँ खः धयादिसें आः बाग्मती प्रदेशन्यंकं हे थुगु कथंया अभियान न्ह्याकेमाः धकाः धयादिल ।

उगु ज्याझ्वलय् चौतारा नगरपालिकया उपप्रमुख सीता थापा, पुलांम्ह मेयर अमानसिंह तामाङ, सिन्धु नेवाः खलःया नायः माधवलाल कर्माचार्य लगायतपिन्सं भिंतुना न्वचू बियादीगु खः । ज्याझ्वःया मू वक्ता देय् दबू स्वनिगः विशेष प्रदेश समितिया नायः नापं पत्रकार श्रीकृष्ण महर्जनं बाग्मती प्रदेशसभापाखें भाषा विधेयक पारित यायेगु नितिं जूगु संघर्ष, भाषा आन्दोलन नापनापं नेपाल संवतयात आन्दोलनया खँ न्ह्यथसें आः बाग्मती प्रदेश दुनेया फुक्क पालिकाय् नं भाषा सम्वन्धी कानुन निर्माण याना ज्या यायेमाःगु अले नेपाल संवत व नेवाः लिपियात नं छ्यला वनेमाःगु खँय् बः बियादिल।

अथे हे देय् दबू स्वनिगः विशेष प्रदेशपाखें आः बाग्मती प्रदेशन्यंकं हे स्थानीय सरकारयात भाषा सम्वन्धि कानुन निर्माण यायकेगु, केन्द्रीय सरकारयात नं भाषा सम्वन्धि कानुन निर्मा याके बिइगु नाप नापं संवत सम्वन्धि कानुन निर्माण याकेगु नितिं अभियान संचालन यायेगु ज्या यानाच्वंगु खँ न्ह्यथसें बाग्मती प्रदेया भाषा विधेयकय् नेपाल संवतयात नं लागू यायेगु धकाः उल्लेख यानातःगु लसताया खँ खः धयादिल । विशेष याना चौतार नगरपालिकाय् नं भाषा सम्वन्धि ऐन दयेकेत अले नेवाः लिपि छ्यलेत माःगु कथं ग्वहालि यायेत थःपिं तयार दु धकाः धयादीगु खः । देय् दबू सिन्धुपाल्चोक जिल्ला समितिया नायः रामशरण श्रेष्ठया सभापतित्वय् केन्द्रीय छ्याञ्जे हरिकुमार श्रेष्ठं न्ह्याकादीगु उगु ज्याझ्वलय् सुभाय् न्वचू बाग्मती प्रदेश समितिया छ्याञ्जे सिता कसजुं बियादीगु खः ।

औपचारिक ज्याझ्वः क्वचाये धुंकाः देय् दबूया नेतृत्व नगरपालिाकया ज्याकुथिइ वना मेयर सापकोटायात नेपालभाषा, लिपि व सम्वत कार्यान्वयनया नितिं कानुन निर्माण याना ज्या यायेत मागयासें ज्ञापन पौ तकं शुक्रवाः हे बिइगु ज्या जूगु दु । उगु इलय् मेयर कृष्णप्रसाद सापकोटां थःम्हं माःगु कथंया ज्या यायेगु नाप नापं मेमेगु नगरपालिकायात नं थज्वःगु ज्या याकेगु नितिं कुतः याये धकाः बचं बियादीगु खः । अथे हे सिन्धुपाल्चोक जिल्ला प्रशासनया ज्याकुथिइ वना नं नेपाल भाषां खँ ल्हायेगु वातावरण ब्वलंकेत नाप नापं नेपाल लिपि तकं साइनबोर्डय् तयेत मागयाना ध्यानाकर्षण पौ तकं लःल्हाःगु खः।

Categorized in राष्ट्रिय