न्हुदँ ने.सं. ११४४ व स्वन्तिया लसताय् नेवाः पत्रकार राष्ट्रिय दबू यल कचापाखे भिंतुना कालबिल व स्थानीय तहनाप नेवाः पत्रकार राष्ट्रिय दबूया भूमिका विषय सहलह ज्याझ्वः जूगु दु।

यल महानगरपालिकाया कार्यवाहक मेयर मन्जली शाक्य मूपाहाँ कथं झायादीगु उगु ज्याझ्वः जुगु खः।

पत्रकार दबू यल शाखाया नायः मन्जु बज्राचार्यया सभाध्यक्षताय् जुगु उगु ज्याझ्वलय् मूपाहाँ कार्यवाहक मेयर उपमेयर शाक्यं नेवाः पत्रकारिता ख्यःया विकास व थ्व ख्यःलिसे स्थानिय सरकारया स्वापू क्वातुकाः यंकेगु निंतिं थःम्हं ग्वाहालि यायेत तयार धकाः धयादीगु खः।

अथेतु, नेवाः पत्रकारिता ख्यःया निंतिं स्थानिय सरकारं छु यायेफइ धइगु लँ मालेत दुग्यंक सहलह याना न्ह्यावनेमाः धका धयादिगु खः। उगु ज्याझ्वलय् नेवाः पत्रकार राष्ट्रिय दबूया केन्द्रीय वरिष्ठ न्वकू सुनिल महर्जन, यल महानगरपालिकाया प्रवक्ता नाप वडा ९ या वडाअध्यक्ष राजु महर्जन, १६ वडा अध्यक्ष निर्मलरत्न शाक्य व वडा २६ वडा अध्यक्ष सुरेश महर्जन, ग्वसाः खलःया सल्लाहकार पत्रकार दबूया निवर्तमान नायः सुरजबीर बज्राचार्य, नेपालभाषा मंकाः खलः यलया नायः हिराकाजी महर्जनं स्थानिय सरकार व सन्चार जगतया विषयस थीथी खँ कनादीगु खः।

दाँभरीं कल्पना महर्जनं लसकुस यानादीगु उगु ज्याझ्वलय् नायः मन्जु बज्राचार्यं सुभाय् बियादीगु खः।

Categorized in राष्ट्रिय