प्रधानमन्त्री पुष्पकमल दाहाल प्रचण्डं नेपाःया मौलिक संवत नेपाल संवत हे जूगु विक्रम संवत आयातित संवत खः धका धयादीगु दु। वय्कलं नेपाल संवत नेपाः देय्या संवत जूगुलिं थःपिन्सं थुगु संवतयात नेपाल संवत राष्ट्रिय संवतया मान्यता बियाः घोषणा यानागु खँ कनादीगु दु।

नेपाल संवत न्हूदँ राष्ट्रिय समारोह समितिं थौं सोमवाः प्रधानमन्त्री प्रचण्डयात नापलानाः न्हूदँया लसताय् कछलाथ्व पारु कार्तिक २८ गते बसन्तपुरय् जुइगु भिंतुना सभा ज्याझ्वलय् मूपाहाँ कथं ब्वनापौ लःल्हायेगु ज्याझ्वलय् प्रधानमन्त्री प्रचण्डं उगु खँ कनादीगु खः । वय्कलं नेपाल संवतयात सम्मान यायेगु कथं सरकारं ज्याखँ न्ह्यःने यंकेगु विचाः नं तयादीगु खः।

समारोह समितिया नायः प्रा.डा. नरेशमान बज्राचार्यं नेपाल संवतया आन्दोलनपाखें याःगु आपालं माग थीथी प्रधानमन्त्री जूपिनिगु पालय् पूवंकेगु जुयाच्वंगु खँ कनादिसें न्हूदँ ११४४ निसें नेपाल सरकारया मन्त्रिपरिषदया बैठकया निर्णय पुस्तिकाय् (माइन्युटय्) नेपाल संवत नं च्वयाः थुगु संवतयात सम्मान यायेत इनाप यानादीगु खः।

अथेहे, तत्कालीन संस्कृतिमन्त्री जीवनराम श्रेष्ठं सरकारपाखें शंखधरया नामं सिरपाः बिइगु नितिं निर्णय याःगु शंखधर सिरपाः कार्यान्वयन यायेत इनाप यानादीगु खः। प्रधानमन्त्री प्रचण्डं समारोह समितिं याःगु थुगु इनापयात सहर्ष स्वीकार यासें न्हूदँया सभाय् सम्भवतः सरकारपाखें थ्व निगुलिं इनाप कार्यान्वयन यायेगु बचं बियादीगु दु । लिसें वय्कलं न्हूदँया भिंतुना सभाय् थःपिं वयेगु वचं बियादीगु खः ।

समारोह समितिया नायः प्रा.डा. बज्राचार्यया नेतृत्वय् प्रधानमन्त्री प्रचण्ड नापलायेत वंगु उगु पुचलय् पूर्व रक्षामन्त्री भीमसेनदास प्रधान, पूर्व स्थानीय विकास व प्रशासनमन्त्री राजेन्द्र श्रेष्ठ, पूर्व संस्कृतिमन्त्री जीवनराम श्रेष्ठ, पूर्व महान्यायाधिवक्ता मुक्ति प्रधानलिसें नेवाः देय् दबूया नायः पवित्र बज्राचार्य व समारोह समितिया सचिवालय दुजःपिं उपस्थित जूगु खः ।

Categorized in राष्ट्रिय