म्ह पुजा व मन्दःया बिधीबारे सिइकेगु ज्या जूगु दु। न्हुदँ समारोह समिति ११४४ मिसा उप समितीया ग्वसालय् थौं शुक्रवाः येँया नेपाः ब्याकेटय् म्हपूजा व मन्दया म्हसिका ज्याझ्वः जुगु दु।

समारोह समितिया नायः लिसें बौद्ध विद्धान प्रा.डा.नरेश मान बज्राचार्यं म्हपुजा व मन्द बिधी बारे जानकारी बियादिगु खः। वयकलं मन्दःयात कया वाक व चित्तया रुपय् कया वयाच्वंगु धारणा पितबिया बिज्यागु दुसा मानव शरिर प्रतित्य समुत्पादया नियमकथं संसारय् जुयाच्वंगु खँ कना बिज्यागु दु अथे हे प्राणीपिं थ्व हे नियमकथं न्ह्याना वयाच्वंगु अति हे महत्वपूणर् दर्शनया खँ नं कनाबिज्याःगु खः।

वयकलं मानव जीवनय् चित्तया तःधंगु भूमिका दयाच्वंगु कारणं याना हे चित्तं हे मनूयात बांलागु ज्या याके बिया महत्वपूर्णयाना च्वनीगु आशय् नं व्यक्त यानाबिज्यागु दु। म्ह पुजा यायगु धैगु म्हय् पुजा यायगु खःसां नं वास्तवय् थ्व पुजा धैगु हे चित्तयात केन्द्रीत याना यायगु खः धकाः नं धया बिज्यागु खः।

छाय् धाःसा चित्तं हे मनूयात सकारात्मक ज्या याके बिया च्वनीगु खः । उकिं मनूया चित्तयात म्हसीकेगु ज्या महत्वपूर्ण खः धका धयादीसे चित्तय् हे बुद्ध जुइ फइगु क्षमता नं दु धकाः नं कना बिज्यागु खःण् । मिसा उप समितिया कजि नानीहिरा महर्जनं न्हयाकादिगु उगु ज्याझ्वलय् भीम रत्न बज्राचार्य म्ह पुजाया वारे बःचाधंक जानकारी बिया बिज्यागु खः ।

Categorized in राष्ट्रिय