नेवाः देय् दबू ख्वप जिल्ला समिति व ख्वप नगर समितिया ग्वसालय् थौं शुक्रवाः ख्वप जिल्ला प्रशासनया प्रमुख रोशनी कुमारी श्रेष्ठयात खेँ सगं नापं धौ सगं बिया भिंतुना देछाःगु ज्या जूगु दु।

जिल्ला प्रशासनया ज्याकुथिइ वना अथे भितुना देछायेगु ज्या जूगु खः। उगु ज्याझ्वलय् नेवाः देय् दबूया केन्द्रीय न्वकू खगेन्द्र श्रेष्ठं नेवाःत कर्मचारीत हरेक क्षेत्रय् न्ह्याः वनेमाःगु खँय् बः बियादिगु खः।

अथे हे नेवाः देय् दबू स्वनिगः विशेष प्रदेशया नायः श्रीकृष्ण महर्जनं ख्वप जिल्लाया प्रशासनय् नेवाः भाय् जक ल्हाइगु खस भाय् ल्हाये मसःगुलिं समस्या जूगु घटनात दु धयादिसें आवंलि भाषाया कायरणं समस्या मजुइगु वातावरण तयार यायोमाः धका धयादिगु खः।

ख्वप जिल्ला प्रशासनया ज्याकुथिइ रञ्जना लिपि नं छ्यलेत ध्यानाकर्षण यानादिगु खः। देय् दबू ख्वप जिल्लाया नायः नरेश नेवालं बागमती प्रदेशय् तकं नेवाः भाय् कामकाजि भाषा जुइ धुंकूगुलिं नेपाल भाषायात थःगु मातहतया लागाय् छ्यलेगु बावतारण दयेकेमाः धयादिगु खः।

ख्वप जिल्ला प्रशासन प्रमुख रोशनी कुमारी श्रेष्ठं समुदायया भावना कथं थः न्ह्याः वनेगु बचं बियादीगु खः।

Categorized in राष्ट्रिय