नेवाः देय् दबू स्वनिगः विशेष प्रदेशं आवंनिसे जेठ १८ गतेयात हाकूगु न्हि कथं महनिइगु जूगु दु । असोज २७ गते थौं तोखाय् च्वंगु स्वनिगः विशेष प्रदेशया मुँज्यां अथे निर्णय याःगु खः।

अथे हे बागमती प्रदेशसभाय् सर्वसम्मत कथं नेपालभाषा व तामाङ भाषायात प्रदेशया सरकारी कामकाजि भाषा कथं लागू यायेगु नितिं विधेयक पारित याःगु दिं असोज २२ गतेयात दँय् दसं नेपालभाषा लसता दिं कथं हनेगु धकाः नं निर्णय याःगु खः ।

स्थानीय सरकारय् स्थानीय भाषा कथं नेवाःतय्गु लागाय् नेपालभाषा लागू यानाच्वंगु अवस्था अले प्रदेशं तकं भाषा विधेयक पारित याःगुलि जेठ १८ यात हाकूगु न्हि कथं हनेगु आवश्यकता मदुगु महसूसयासें अज्यागु निर्णय याःगु खः । देय् दबू स्वनिगः विशेष प्रदेशया नायः श्रीकृष्ण महर्जनया नायःसुइ जूगु उगु मुँज्याय् मूछ्याञ्जे गणेशमान श्रेष्ठं आः तक देय् दबू स्वनिगः विशेष प्रदेशं याना वयाच्वंगु गतिविधि व दांभरी जीवनदेवी बज्राचार्यं आर्थिक ल्याःचाः न्ह्यब्वयादीगु खः ।

अथे हे नायः श्रीकृष्ण महर्जनं देय् दबू स्वनिगः विशेष प्रदेशपाखें आः यायेगु ज्या कथं बागमती प्रदेशसभां पारित याःगु भाषा विधेयकयात कार्यान्वयनया नितिं माःगु कथं पहल यायेगु, नेपालभाषायात सरकारी कामकाजि भाषाया रुपय् लागू यायेत अःपुकेगु नितिं नेपालभाषाया मानविकरणया नितिं माःगु भूमिका म्हितेगु, संघीय भाषा ऐन दयेकेगु नितिं व स्थानीय सरकारपाखें पालिकाया भाषा ऐन दयेके बिइगु नितिं माःगु कथं भूमिका म्हितेगु धकाः नं प्रस्ताव तयादीगुयात मुँज्यां पारित याःगु खः ।

उगु हे कथं स्वनिगःयंकं नेवाः वस्तीइ सांस्कृतिक संरक्षित क्षेत्र घोषणा याकेगु अभियान न्ह्याकेगु, स्वनिगःया थाय् बाय्या नापं पुलांगु हे प्राचिन नां तयेकेगु नितिं अभियान न्ह्याकेगु, संविधानया धारा ५६ या ५ य् दुगु स्वायत्त, संरक्षित व विशेष क्षेत्रया सवालय् तत्कालीन आयोगं पूमवंकूगु ज्यायात न्ह्याकेगु धकाः तकं भावि योजना तयार याःगु दु।

Categorized in राष्ट्रिय